ထိရောက်သောတော်လှန်ရေးကို ဖော်ဆောင်ရန် KNPP ပြော
အမျိုးသားညီညွတ်ရေးအစိုးရ(NUG)က ယနေ့(ဩဂုတ် ၉ရက်) ကျရောက်သည့် (၇၄)နှစ်ပြည့် ကရင်နီအမျိုးသားခုခံတော်လှန်ရေးနေ့သို့ သဝဏ်လွှာပေးပို့ ပြောကြားခဲ့သည်။
မြန်မာပြည် လွတ်လပ်ရေး ရရှိပြီးနောက် ဖဆပလတပ်များက ကရင်နီ ပြည်ထောင်စုကောင်စီ ရုံးစိုက်ရာ မန်းလား (မြလဲ) ရွာကို ၁၉၄၈ ဩဂုတ် ၉ ရက်တွင် ဝင်ရောက်တိုက်ခိုက်လာခဲ့ရာ လွတ်လပ်သည့် ကရင်နီပြည် ပြန်လည်တည်ထောင်ရေးကို မျှော်မှန်း၍ ကရင်နီခေါင်းဆောင်များ သည် မြန်မာပြည် ဖဆပလ အစိုးရကို လက်နက်ကိုင်ခုခံတော်လှန်ရေးဖြင့် စတင်ဆင်နွဲခဲ့ကြောင်း၊ ယင်းနေ့ကို ကရင်နီအမျိုးသားခုခံတော်လှန်ရေး နေ့အဖြစ် သတ်မှတ်ပြီး နှစ်စဉ်ကျင်းပခဲ့ကြောင်း ဖော်ပြထားသည်။
ခုခံတော်လှန်စစ် ဆင်နွှဲလာခဲ့သည့် နှစ်ပေါင်း (၇၄) နှစ်အတွင်း ကရင်နီ အမျိုးသား ခေါင်းဆောင်၊ တပ်ဗိုလ်၊ တပ်မှူး၊ တပ်သားနှင့် ပြည်သူလူထု၏ အသက်ပေါင်းများစွာ ပေးဆပ်ခဲ့ရသည်ကို အမှတ်ရလျက် လေးစားဦးညွတ်အလေးပြုကြောင်း NUGက သဝဏ်လွှာပေးပို့သည်။
၂၀၂၁တွင် စစ်ကောင်စီက တိုင်းပြည်အာဏာသိမ်းရန် ကြိုးပမ်းမှုအပေါ် ကရင်နီတမျိုးသားလုံးနှင့် ကရင်နီတော်လှန်ရေးအင်အားစုများက လက်မခံဘဲ ဆန့်ကျင်တော်လှန်နေကြသည်ကို မြင်တွေ့ရ၍ များစွာဝမ်းမြောက်မိကြောင်း၊ စစ်အာဏာရှင်စနစ်ချုပ်ငြိမ်းရေး၊ ဖက်ဒရယ်ဒီမိုကရေစီပြည်ထောင်စု တည်ဆောက်ရေးနှင့် ကရင်နီအမျိုးသားခုခံ တော်လှန်ရေးအောင်ပွဲတို့ အမြန်ဆုံးရရှိနိုင်ရေးအတွက် ကရင်နီအမျိုးသားခုခံတော်လှန်ရေး အင်အားစုများနှင့် လက်တွဲဆောင်ရွက်သွားမည် ဖြစ်ကြောင်း ကတိပြုသည်ဟု သဝဏ်လွှာ၌ ဖော်ပြထားသည်။
Public Service Announcement
NUG ကာကွယ်ရေးဝန်ကြီးဌာနကလည်း သဝဏ်လွှာပေးပို့ခဲ့ရာ စစ်အာဏာရှင်စနစ်အပါအဝင် အာဏာရှင်စနစ်အားလုံး ချုပ်ငြိမ်းပြီး ကိုယ်ပိုင်ပြဌာန်းခွင့်၊တန်းတူရေးနှင့် တရားမျှတရေးတို့ကို အပြည့်အဝ အာမခံသော အနာဂတ်ဖက်ဒရယ် ဒီမိုကရေစီပြည်ထောင်စုကို အတူတကွ လက်တွဲတည်ဆောက်နိုင်ပါစေဟု ဖော်ပြခဲ့သည်။
ယနေ့ကျရောက်သည့် ကရင်နီ အမျိုးသားခုခံတော်လှန်ရေးနေ့သို့ ကရင်နီအမျိုးသားတိုးတက်ရေး ပါတီ(KNPP)ကလည်း သဝဏ်လွှာပေးပို့ရာ ခုခံတော်လှန်ရေး ပိုမိုအားကောင်းလာစေရန်နှင့် အမြန်ဆုံး အောင်မြင်နိုင် ရေးအတွက် ကရင်နီ အမျိုးသားထု တစ်ရပ်လုံး၏ ဘုံအကျိုးစီးပွားကို ဦးထိပ်ထားရန်လိုအပ်ကြောင်း၊ စည်းလုံးညီညွတ်ရန် အထူးလိုအပ်ကြောင်း ဖော်ပြခဲ့သည်။
လက်ရှိ အခြေအနေတွင် လူမှုရေး၊ နိုင်ငံရေးနှင့် စစ်ရေးအရ သွေးခွဲနေသည့် အချိန်အခါဖြစ်၍ တော်လှန်ရေး သတိ အမြဲရှိနေရမည်အချိန်ဖြစ်ကြောင်း KNPPက ဆိုသည်။
ယနေ့ ရင်ဆိုင်နေရသည့် နိုင်ငံရေးအကြပ်အတည်းသည် အထွပ်အထိပ်သို့ ရောက်ရှိနေသည့် ကာလဖြစ်သကဲ့သို့ နိုင်ငံတွင် မကြုံစဖူးသော တော်လှန်ရေး စိတ်ဓာတ်အသစ်နှင့် ပူးပေါင်း ဆောင်ရွက်မှု အသစ်များကိုလည်း နိုင်ငံတစ်ဝှမ်းရှိ တိုင်းရင်းသားလူမျိုး အသီးသီးများအကြား တွင် မြင်တွေ့နေရကြောင်း၊ သို့ဖြစ်၍ အခွင့်အရေးကို ထိထိမိမိ ဆုပ်ကိုင်ပြီး ပို၍ ထိရောက်မှုရှိသော တော်လှန်ရေး လက်နက်တစ်ခုအဖြစ် အသုံးပြုသွားနိုင်ရေး တော်လှန်ရေးကို ဦးဆောင်နေသော အဖွဲ့အစည်းများနှင့် ခေါင်းဆောင်များတွင် တာဝန်ရှိကြောင်း KNPP၏ သဝဏ်လွှာ၌ ဖော်ပြထားသည်။
သို့မှသာ ပြည်သူများနှင့် တော်လှန်ရေးရဲဘော်ရဲဘက်များ၏ ပေးဆပ်မှုသည် ထိုက်တန်သည့် အနစ်နာခံခြင်းဖြစ်ပေမည်ဟု KNPPက သဝဏ်လွှာပေးပို့ ခဲ့သည်။
