ပဲခူးတိုင်း ပေါင်းတည်မြို့နယ်တွင် စစ်ကောင်စီတပ် က အရပ်သားတစ်ဦးကို ဖမ်းဆီးသတ်ဖြတ်ပြီး စစ်ဘေးရှောင်ပြည်သူများ၏ တဲ ၁၁လုံးကိုလည်း မီးရှို့ဖျက်ဆီးခဲ့သည်။
ပေါင်းတည်မြို့နယ် သိမ်ကုန်းအုပ်စု လဲပင်ကျေးရွာမှ အသက်(၅၂)နှစ်အရွယ် ဦးဖိုးဝ(ခ)ဦးသိန်းဇော်အား စစ်ကောင်စီက သတ်ဖြတ်သွားခြင်းဟုပေါင်းတည်မြို့နယ်ပြည်သူ့ကာကွယ်ရေးတပ်ဖွဲ့ (PPDF)က သတင်းထုတ်ပြန်သည်။
“ဦးဖိုးဝကို ဖမ်းသွားတာက အောက်တိုဘာ ၂၉ ရက်မှာ။ ကျွန်တော်တို့ အလောင်းပြန်တွေ့တာက နိုဝင်ဘာ ၁ရက်နေ့။ PDF ကို မဲပြီးသတ်ပစ်တာ” ဟု PPDF တာဝန်ရှိသူတစ်ဦးက ပြောသည်။
စစ်ကောင်စီတပ်သည် ပဲခူးရိုးမနှင့် ထိစပ်နေသော လဲပင်ကျေးရွာအတွင်းတွင် ပြီးခဲ့သည့်မတ်လက မိုင်းဆွဲတိုက်ခိုက်ခံရပြီးနောက် လဲပင်ကျေးရွာတွင် လာရောက်တပ်စွဲထားခြင်းဖြစ်သည်။ ထိုအချိန်မှစ၍ ဒေသခံများထွက်ပြေးတိမ်းရှောင်နေခဲ့ကြရသည်။
Public Service Announcement
လဲပင်ရွာအနီး စစ်ကြောင်းထိုးလာသည့် အင်အား ၆၀ခန့်ပါ စစ်ကောင်စီစစ်ကြောင်းကို ပြည်ခရိုင် PDFက အောက်တိုဘာ ၂၇ရက်တွင် တိုက်ခိုက်ခဲ့သည်။
ထို့နောက် စစ်ကောင်စီတပ်သည် စစ်ဘေးရှောင် များရှိရာဆီအထိ ရောက်လာပြီး အရပ်သားတစ် ဦးကို ဖမ်းဆီးသတ်ဖြတ်ခြင်း၊ အိမ်မွေးတိရိစ္ဆာန် များကို ဖမ်းဆီးသတ်ဖြတ်စားသောက်ခြင်း၊ စစ်ဘေးရှောင်တဲများအား မီးရှို့ခြင်းများပြုလုပ် နေသည်ဟု ပြည်သူ့ကာကွယ်ရေးရဲဘော်များကပြောသည်။
ပဲခူးတိုင်းအခြေစိုက် ပြည်သူ့ကာကွယ်ရေးတပ်ဖွဲ့ဝင်များနှင့် မြို့ပြပျောက်ကျားတပ်ဖွဲ့များအနေဖြင့်အကြမ်းဖက်စစ်ကောင်စီတပ်ဖွဲ့များနှင့် စစ်ကောင်စီ ထောက်တိုင်များကို ဆက်လက်ချေမှုန်းတိုက်ခိုက်သွားမည်ဟု သတိပေးထားသည်။
