ကရင်အမျိုးသားအစည်းအရုံး(KNU) တပ်မဟာ နယ်မြေများတွင် ဩဂုတ်လအတွင်းက တိုက်ပွဲ ၂၀၀ ကျော်ဖြစ်ပွားခဲ့ရာ စစ်ကောင်စီဘက်က ၁၆၀ကျော်သေဆုံးပြီး ၁၀၀ ကျော်ဒဏ်ရာရခဲ့ကြောင်း KNU ဗဟိုသတင်းနှင့်ပြန်ကြားရေးဌာနက ထုတ်ပြန်သည်။
KNU တပ်မဟာ၇ခုရှိသည့်အနက် တပ်မဟာ ၅ခု၏ နယ်မြေများ၌ တိုက်ပွဲဖြစ်ပွားခဲ့ပြီး တပ်မဟာ(၄)နှင့် တပ်မဟာ(၇)နယ်မြေတို့၌ တိုက်ပွဲဖြစ်ပွားမှုမရှိဟု ဆိုသည်။
စစ်ကောင်စီတပ်က စစ်ရေးလှုပ်ရှားမှုများပြုလုပ်လာ၍ ဩဂုတ်လအတွင်းက သထုံခရိုင် တပ်မဟာ (၁) ထိန်းချုပ်နယ်မြေ၌ တိုက်ပွဲ ၂၄ကြိမ်၊ တောင်ငူ ခရိုင် တပ်မဟာ( ၂)ထိန်းချုပ် နယ်မြေ၌ ၆ကြိမ်၊ညောင်လေးပင်ခရိုင် တပ်မဟာ (၃) ထိန်းချုပ်နယ်မြေ၌ ၂ကြိမ်၊ ဖာပွန်ခရိုင်တပ်မဟာ (၅)ထိန်းချုပ်နယ်မြေ၌ ၁၈၁ကြိမ်၊ ဒူးပလာယာခရိုင် တပ်မဟာ (၆) ထိန်းချုပ်နယ်မြေ၌ ၄ကြိမ် စုစုပေါင်း တိုက်ပွဲ ၂၁၇ကြိမ်ဖြစ်ပွားခဲ့ရာ စစ်ကောင်စီဘက်မှ ၁၆၆ဦးသေဆုံးပြီး ၊ ၁၀၁ ဦးဒဏ်ရာ ရခဲ့သည်ဟု ထုတ်ပြန်သည်။
အဆိုပါ တိုက်ပွဲများ၌ KNUတပ်ဖွဲ့ဝင်များ ထိခိုက်ဒဏ်ရရမှု အခြေအနေကိုမူ ထုတ်ပြန်ခဲ့ခြင်းမရှိပေ။ သို့ရာတွင် စစ်ကောင်စီတပ်ကို ပြောက်ကျားစနစ်ဖြင့် တိုက်ခိုက်ခဲ့ခြင်းဖြစ်၍ KNU တပ်ဖွဲ့ဝင်များ ထိခိုက်ကျဆုံးမှု နည်းပါးဟု KNU တာဝန်ရှိသူတစ်ဦးက ပြောသည်။
Public Service Announcement
စစ်ကောင်စီ၏ တပ်များသည် ပြည်သူလူထုကို သတ်ဖြတ်ခြင်း၊ ကြောက်လန့် အောင်ပြုလုပ်ပြီး ပစ္စည်း အဓမ္မ လုယူမှုများလည်း ရှိခဲ့သည့်အပြင် ဒေသခံ ပြည်သူများကို ဖမ်းဆီးခြင်း၊ စစ်တပ်အသုံးအဆောင်ပစ္စည်းများ သယ်ဆောင် ပေးရန် အတင်းအဓမ္မ ခိုင်းစေခြင်းများ ပြုလုပ်ခဲ့သည်ဟု ထုတ်ပြန်သည်။
ပြည်သူများ လုပ်ကိုင်စားသောက်နေသော လုပ်ငန်း ခွင် နှင့် ကျေးရွာ များအတွင်းသို့ လက်နက်ကြီးများ ပစ်ခတ် ခြင်း၊တပ်မဟာနယ်မြေအချို့၌ လေကြောင်းမှ ထောက် လှမ်းခြင်း၊ပြည်သူလူထုများ သွားလာ သောနေရာများ၊ လုပ်ကိုင်စားသောက်သောနေရာများ နှင့် လမ်းမ များပေါ်တွင် မိုင်းထောင်ခြင်းများ ပြုလုပ်ခဲ့သည်ဟု ထုတ်ပြန်ခဲ့သည်။
KNUသည် စစ်အာဏာသိမ်းမှုကို ဆန့်ကျင်သည့် မည်သည့်အဖွဲ့အစည်းနှင့်အတူ လက်တွဲပြီး အာဏာရှင်အားလုံးကို ဆန့်ကျင်တော်လှန်သွားမည်ဟု သဘောထားထုတ်ပြန်ထားသည်။
