မြင်းခြံနယ် ပျားကျေးရွာတွင် တပ်စွဲထားသည့် စစ်အုပ်စုကို တိုက်ခိုက်၊ စစ်ကူကားပါ မိုင်းဆွဲခံရပြီး ၁၃ဦးခန့်သေဟုဆို

မန္တလေးတိုင်း မြင်းခြံနယ် ပျားကျေးရွာတွင် ရောက်ရှိနေသော စစ်ကောင်စီတပ်အား မဟာမိတ်တပ်ဖွဲ့များနှင့်အတူ သွားရောက်တိုက်ခိုက်ခဲ့ကြောင်း မြင်းခြံခရိုင် PDF တပ်ရင်း (၄) နွားထိုးကြီး ပြည်သူ့ကာကွယ်ရေးတပ်ဖွဲ့(NPDF) က ပြောသည်။

နိုဝင်ဘာ ၈ ရက် ညနေ ၅ နာရီခန့်က ပျားကျေးရွာသို့ ရောက်ရှိနေသော အင်အား ၃၀ခန့်ပါ စစ်ကောင်စီတပ်အား မြင်းခြံခရိုင် တပ်ရင်း (၄)နှင့်အတူ People’s Defense Force – Mandalay၊ 27 Revolution Forces၊ ဗိုလ်စားပြောက်ကျားတပ်ဖွဲ့ တို့ပူးပေါင်း၍ ၀င်ရောက်တိုက်ခိုက်ခြင်းဖြစ်ပြီး တိုက်ပွဲချိန် ၁ နာရီခန့်ကြာမြင့်သည်ဟု ဆိုသည်။

အဆိုပွဲတိုက်ပွဲတွင် စစ်ကောင်စီတပ်ဘက်မှ ခုနစ်ဦးသေဆုံးပြီး တိုက်ခိုက်ခံရမှုကြောင့် စစ်ကောင်စီတပ်မှ ကားသုံးစီးဖြင့် စစ်ကူလာရောက်ရာ ယင်းစစ်ကူယာဥ်များအား ထပ်မံမိုင်းဆွဲတိုက်ခဲ့ကြောင်း နွားထိုးကြီး PDF က ပြောသည်။

ထိုသို့ မိုင်းဆွဲတိုက်ခိုက်ရာတွင် စစ်ကားတစ်စီးပျက်စီးသွားပြီး စစ်ကောင်စီတပ်မှ ခြောက်ဦးထက်မနည်း ထပ်မံသေဆုံးကာ ပြန်လည်ပစ်ခတ်မှုများရှိခဲ့သော်လည်း တော်လှန်ရေးရဲဘော်များ အထိအခိုက်မရှိခဲ့ဟု ဆိုသည်။

Public Service Announcement

“တိုက်ပွဲပြီးသွားတော့ စခတွေက ရွာကိုမီးရှို့ဖျက်ဆီးတဲ့အတွက် သတင်းထုတ်ပြန်ဖို့ အဆင်မပြေလို့ အခုမှထုတ်ပြန်ရတာပေါ့။ ပျားရွာက အိမ်ခြေ ၅၀ လောက် မီးရှို့ခံလိုက်ရတယ်”ဟု မြင်းခြံခရိုင် တပ်ရင် (၄) နွားထိုးကြီး PDF မှ တော်လှန်ရေးရဲဘော်တစ်ဦးက ရှင်းပြသည်။

အထက်ပါ တိုက်ခိုက်မှုများအတွင်း စစ်ကောင်စီတပ်ထံမှ MA 11 အမျိုးအစား သေနတ်တစ်လက် 5.56 ကျည် (၂၇)တောင့်သိမ်းဆည်းရရှိခဲ့ပြီး တော်လှန်ရေးရဲဘော်များ အောင်မြင်စွာဆုတ်ခွာနိုင်ခဲ့ကြောင်း အသိပေးထားသည်။