မြန်မာ စစ်ကောင်စီကို ဆန့်ကျင်နေတဲ့ နိုင်ငံအတွင်း တရားမဝင် ခိုလှုံနေသူတွေကို ထိုင်းအစိုးရဟာ ဖမ်းဆီးဖို့စီစဉ်နေပြီး နိုင်ငံတကာအသိုင်းအဝိုင်းက ထောက်ပံ့မှသာ ခိုလှုံလာသူ မြန်မာဒုက္ခသည်တွေကို လက်ခံမယ်လို့ အေးရှားတိုင်းမ် သတင်းစာမှာဖော်ပြထားပါတယ်။
မြန်မာနိုင်ငံမှာ ပဋိပက္ခတွေဖြစ်တဲ့အခါတိုင်း အိမ်နီးချင်းထိုင်းနိုင်ငံ အပေါ် ရိုက်ခတ်ခဲ့တဲ့သမိုင်းကြောင်းလည်းရှိတဲ့ အပြင် ထိုင်းနိုင်ငံဟာ စစ်အာဏာရှင်ကိုဆန့်ကျင်သူတွေအတွက် ခိုလှုံရာလည်းဖြစ်ခဲ့ပါတယ်။
မြန်မာနိုင်ငံမှာ စစ်အစိုးရ ကြီးစိုးချိန် ကာလတွေမှာ တိမ်းရှောင်ရတဲ့ ဒုက္ခသည်တွေကို ထိုင်းအစိုးရဟာ နှစ်နိုင်ငံ နယ်စပ် အနီးမှာ ဒုက္ခသည်စခန်းတွေကို ဖွင့်လှစ်ပေးခဲ့တာရှိပါတယ်။
ဒါပေမယ့်အခုတော့ ထိုင်းအစိုးရဟာ နိုင်ငံအတွင်း တရားမဝင် နေထိုင်ပြီး မြန်မာစစ်ကောင်စီကို ဆန့်ကျင်နေသူတွေကို ဖမ်းဆီးချင်နေတာလို့ အေးရှားတိုင်းမ်းက ဆိုထားပါတယ်။
Public Service Announcement
ဒါအပြင် ခိုလှုံခွင့်တောင်းသူတွေကိုလည်း အနည်းငယ်ကိုသာ လက်ခံမှာဖြစ်ပြီး ဒါဟာလည်း နိုင်ငံတကာ အသိုင်းအဝိုင်းက ထောက်ပံ့ပေးနေတဲ့ ကာလ အတွင်းမှာသာဖြစ်တယ်လို့ ဘန်ကောက်မှာရှိတဲ့ နိုင်ငံခြားသံရုံးတွေကို ထိုင်းအစိုးရက အကြောင်းကြားထားတယ်လို့ သိရပါတယ်။
မြန်မာ့အာဏာသိမ်း စစ်ခေါင်းဆောင်နဲ့ ထိုင်းဝန်ကြီးချုပ် တို့ကြားဆက်ဆံရေးဟာ အဆင်ပြေနေတယ်လို့သိရပြီး မြန်မာစစ်ကောင်စီကို ဆန့်ကျင်တဲ့သူတွေကို ထိုင်းအစိုးရဟာ နေရာမပေးတော့ဖို့ စီစဉ်လာတယ်လို့ အေးရှားတိုင်းမ်ရဲ့ ဖော်ပြချက်မှာ ပါရှိပါတယ်။
ကိုးကား − အေးရှားတိုင်းမ်
