အကြမ်းဖက်စစ်ကောင်စီတပ်က စစ်ကိုင်းတိုင်း၊ ရွှေဘိုမြို့နယ်ရှိ ကံကြီးတောကျေးရွာရှိ ဘုန်းတော်ကြီးကျောင်းအပါအဝင် နေအိမ်အများအပြား မီးရှို့ဖျက်ဆီးသွားကြောင်း ဒေသခံများက ပြောသည်။
ဝက်လက်မြို့နယ်၊ ဟန်လင်းပျူမြို့ဟောင်း၌ အထိုင်ချတပ်စွဲထားသော စစ်ကောင်စီတပ်သည် ယမန်နေ့ (ဇန်နဝါရီ ၁၂ ရက်) မွန်းလွဲ ၂နာရီခန့်က ကံကြီးတောကျေးရွာသို့ အင်အားအများအပြားဖြင့် ဝင်ရောက်ကာ မီးရှို့ဖျက်ဆီးခဲ့ခြင်းဖြစ်သည်။
ကံကြီးတောရွာ ဘုန်းကြီးကျောင်းအပါအဝင် နေအိမ်အများအပြား မီးလောင်ပြာကျခဲ့ကြောင်း ဒေသခံများက ပြောသည်။
“ဝက်လက်မြို့နယ်နဲ့ ရွှေဘိုမြို့နယ်အစပ်ကရွာ ကံကြီးတောရွာကို ရွာဦးကျောင်းကစပြီး မအလတပ်တွေက မီးရှို့တယ်။ အိမ်ခြေ ၅၀ ကျော် မီးရှို့ဖျက်ဆီးသွားကြတယ်။ ဟန်လင်းမှာ တပ်အထိုင်ချပြီး အနီးနားပတ်ဝန်းကျင်ပတ်လည်လှည့် သောင်းကျန်းနေကြတာ။”ဟု ဒေသခံတစ်ဦးက ပြောသည်။
Public Service Announcement
ကံကြီးတောကျေးရွာအား မီးရှို့ဖျက်ဆီးနေသော စစ်ကောင်စီတပ်ကို BLACK WOLF – Army နှင့် Who Am I အဖွဲ့တို့ကလည်း ယမန်နေ့မွန်းလွဲပိုင်းက တိုက်ခိုက်ခဲ့သေးသည်။
ဟန်လင်းပျူမြို့ဟောင်းတွင် စစ်ကောင်စီတပ်က လပေါင်းအတန်ကြာတပ်စွဲထားပြီး အနီးဝန်းကျင်ကျေးရွာများအား မကြာခဏစစ်ကြောင်းထိုးဖျက်ဆီးနေသည်။
