စစ်ကိုင်းတိုင်း ကနီမြို့နယ်တွင် ချင်းတွင်းမြစ်အတွင်း စုန်ဆင်းလာသော စစ်ကောင်စီရေယာဥ်အုပ်စု ပြည်သူ့ကာကွယ်ရေးမဟာမိတ်များ တိုက်ခိုက်ခဲ့ရာ စစ်အုပ်စုထိခိုက်သေဆုံးမှုရှိကြောင်း ယင်းမာပင်ခရိုင်တပ်ရင် ( ၃၅)ကသတင်းထုတ်ပြန်သည်။
ချင်းတွင်းမြစ်အတွင်း သောင်တင်နေသော စစ်ကောင်စီရေယာဥ်များဆီသို့ စစ်ကူရန် မုံရွာမြို့မှ ထွက်ခွာလာသော ရေယာဥ်အုပ်စုသည် ယနေ့(ဇန်နဝါရီ ၁၈ရက်)တွင် ကနီနယ်သို့ရောက်ရှိလာစဥ် ဒေသတွင်းအခြေစိုက် ပြည်သူ့ကာကွယ်ရေး မဟာမိတ်များက တိုက်ခိုက်ခဲ့ခြင်းဖြစ်သည်။
“မနက် ၁၀နာရီကျော်လောက်ကနေ ချကြတာ။ နေ့ခင်း ၁နာရီခန့်ကျမှ ရပ်ကြတယ်။ စ…(စစ်ကောင်စီတပ်သား)တွေ သေတယ်ကြားလို့ ဝမ်းသာနေတာ”ဟု ကနီဒေသခံအမျိုးသမီးတစ်ဦးက ပြောသည်။
စစ်ကောင်စီဖက်မှ ထိခိုက်သေဆုံးမှုရှိသော်လည်း အရေအတွက်မသိရကြောင်း၊ ပြည်သူ့ကာကွယ်ရေးရဲဘော်များအားလုံး ထိခိုက်ဒဏ်ရာ မရရှိဘဲ အောင်မြင်စွာ ပြန်လည်ဆုတ်ခွာနိုင်ခဲ့ကြောင်း ယင်းမာပင်ခရိုင်တပ်ရင် ( ၃၅) People’s Defence Army – Yinmarbinက သတင်းထုတ်ပြန်ထားသည်။
Public Service Announcement
ကနီမြို့နယ် ချင်းတွင်မြစ်ကြောင်းအတွင်း ဇန်နဝါရီလဆန်းကာလက တိုက်ပွဲတွင် စစ်ကောင်စီရေယာဥ်တစ်စီးကို ပြည်သူ့ကာကွယ်ရေးမဟာမိတ်များက တိုက်ခိုက်နှစ်မြုပ်နိုင်ခဲ့သည်။ အဆိုပါ စစ်ကောင်စီရေယာဥ်ပေါ်မှ သိမ်းယူနိုင်ခဲ့သော ဆန်နှင့် ရိက္ခာများကို စစ်ဘေးရှောင်ပြည်သူများထံ ပြည်သူ့ကာကွယ်ရေးတပ်ဖွဲ့များက ပေးအပ်ခဲ့သည်။
