မြင်းခြံမြို့နယ်တွင် စစ်အုပ်စုကို ထပ်မံမိုင်းဆွဲတိုက်ခိုက်

မန္တလေးတိုင်း၊ မြင်းခြံမြို့နယ်၊ နဘူးရွာအိုင်မှထွက်လာသော စစ်ကောင်စီတ​ပ်ဖွဲ့ဝင်များအား လေးရက်အတွင်း ဒုတိယကြိမ်မြောက်ထပ်မံတိုက်ခိုက် ခဲ့ကြောင်း ရွှေခြံသားပြောက်ကျားတပ်ဖွဲ့က သတင်းထုတ်ပြန်သည်။

ယမန်နေ့ (ဇန်နဝါရီ ၂၉ ရက်) မွန်းလွဲ ၂နာရီခွဲခန့်က မြင်းခြံမြို့နယ်၊ နဘူးအိုင်ရွာမှ ထွက်ခွာလာသော ပါကျဲရိုးယာဉ်ပေါ်တွင် စစ်ကောင်စီတပ်ဖွဲ့ဝင်များ တင်လာသည်ဟု သတင်းရ၍ နဘူးအိုင်-မြင်းခြံလမ်းပိုင်းတစ်နေရာတွင် မိုင်းဆွဲတိုက်ခိုက်ခဲ့ရာ ယာဉ်ပေါ်ပါ စစ်ကောင်စီအုပ်စုများ ထိခိုက်မှုများရှိနိုင်ကြောင်း ရွှေခြံသားပြောက်ကျားတပ်ဖွဲ့က အသိပေးသည်။

အသေအပျောက်အခြေအနေကို စုံစမ်းနေပြီး ဆက်လက်ထုတ်ပြန်ပေးသွားမည်ဟု ရွှေခြံသားပြောက်ကျားတပ်ဖွဲ့က ဆိုသည်။

ဖြစ်စဥ်နှင့်ပတ်သက်၍ ရွှေခြံသားပြောက်ကျားတပ်ဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်းမရှိသေးပေ။

Public Service Announcement

အဆိုပါဖြစ်စဥ်ဖြစ်ပွားခဲ့ပြီး ထိခိုက်မှုမသိရသေးကြောင်း မြင်းခြံလူထုလှုပ်ရှားမှုကော်မတီက အတည်ပြုသည်။

ဇန်နဝါရီလ၂၆ ရက် ညနေပိုင်းကလည်း နဘူးအိုင်ရွာမှ ဆိုင်ကယ် ၇စီး၊ ယာဥ်ငယ်နှစ်စီးဖြင့် ရွေးကောက်ပွဲအတွက်စာရင်းကောက်ရန်ထွက်လာသော စစ်အုပ်စုကို ရွှေခြံသားပြောက်ကျားတပ်ဖွဲ့ကပင် ဖက်ရင်းကျေးရွာနှင့်လေးတန်းကျေးရွာကြား၌ ပဒေသာမိုင်းများဖြင့်မိုင်းဆွဲတိုက်ခိုက်ခဲ့ရာ ထိခိုက်သေဆုံးမှုရှိခဲ့သည်။