မန္တလေးတိုင်း ပုသိမ်ကြီးမြို့နယ် သမ္မတောကျေးရွာတွင် အကြမ်းဖက်စစ်ကောင်စီက အင်အား အလုံးအရင်းဖြင့် ဝင်ရောက်ဖမ်းဆီးခဲ့ရာ ဒုဌဝတီ တော်လှန်ရေးအင်အားစုမှ ရဲဘော်ငါးဦး ဖမ်းဆီးခံခဲ့ရကြောင်း မန္တလေးအခြေစိုက် အဖွဲ့တစ်ဖွဲ့မှရဲဘော်တစ်ဦးက ပြောသည်။
မတ်လ ၁၄ ရက် ည ၉ နာရီခွဲ အချိန်ခန့်တွင် အကြမ်းဖက်စစ်ကောင်စီ တပ်ဖွဲ့ဝင်များက Faw ကား ငါးစီးဖြင့်ရောက်ရှိလာကာ ဘုန်းကြီးကျောင်း အနီးရှိအိမ်များကို စစ်ဆေး၍ အိမ်ငှားနေသည့် မိသားစု ငါးဦးကို ဖမ်းဆီးသွားခြင်းဖြစ်ကြောင်း ၎င်းက ပြောသည်။
အဆိုပါဖမ်းဆီးခံရသူများသည် ဒုဌဝတီတော်လှန်ျရးအင်အားစုမှ ရဲဘော်များဖြစ်သောကြောင့် တော်လှန်ရေးအင်အားစုများအနေဖြင့် ယင်းအဖွဲ့၏ ဖေ့စ်ဘွတ်ခ်သို့ဆက်သွယ်ခြင်းမပြုရန် ၎င်းက သတိပေးသည်။
“မဟာမိတ်တွေလည်း ဂရုစိုက်ကြပါ။ အခုရက်ပိုင်းတော်တော်များများပါနေလို့။ ပြည်သူတွေလည်း ဝိုင်းဝန်းကူညီပေးကြပါလို့တောင်းဆိုပါတယ်”ဟု အထက်ပါရဲဘော်က ပြောသည်။
Public Service Announcement
ဒုဌဝတီတော်လှန်ရေးအင်အားစုသည် မန္တလေးအခြေစိုက်အဖွဲ့ဖြစ်ပြီး အကြမ်းဖက်စစ်ကောင်စီကို တိုက်ခိုက်နေသည့်အဖွဲ့ ဖြစ်သည်။
မတ်လ ၁၅ ရက်နံနက်တွင် မန္တလေးမြို့ရှိ နေရာငါးခု၌ အကြမ်းဖက်စစ်ကောင်စီများက စစ်ဆေးမှုများပြုလုပ်နေပြီး နေ့လည် ၁ နာရီခန့်တွင် မန္တလေး စာတိုက်ကြီးရှေ့၌ Faw ကား ရှစ်စီးတွေ့ရသလို ရွှေကျင်တိုးဂိတ်ဘက်သို့ စစ်ကောင်စီအင်အား ၆၀ ခန့်က Faw ကား ၄ စီး ၊ DC ၃ စီး ဖြင့် ထွက်ခွာသွားကြောင်း မန္တလေးမြေပြင်အခြေအနေများကို ဖော်ပြပေးနေသည့် သပြေညို သတင်းလွှာက အသိပေးထားသည်။
