သပိတ်ကျင်းနှင့် စဉ့်ကူးနယ်တွင် အထိနာနေသည့် စစ်အုပ်စုက ကျေးရွာနေအိမ်များ မီးရှို့ဖျက်ဆီး

မန္တလေးတိုင်း၊ သပိတ်ကျင်းနှင့် စဉ့်ကူးမြို့နယ် နယ်စပ်၌ လေးရက်အတွင်း တိုက်ပွဲတွင် အထိနာနေသည့် စစ်ကောင်စီတပ်က ကျေးရွာနေအိမ်များအား မီးရှို့ဖျက်ဆီးသွားကြောင်း ဒေသတွင်းတော်လှန်ရေးအင်အားစုများက ပြောသည်။

အဆိုပါနယ်ကြားတွင် မတ်လ ၁၁ ရက်မှ ၁၄ ရက်အထိ စစ်ကောင်စီတပ်အား ဗိုလ်လင်းယုန်တပ်ဖွဲ့၊ စဉ့်ကူး(ပ.က.ဖ)၊ Nine PDFတပ်ဖွဲ့တို့ ပူးပေါင်းကာ မိုင်းပေါင်း ၅၄ လုံးဖြင့် ဖောက်ခွဲတိုက်ခိုက် ခဲ့သည်။

သပိတ်ကျင်းမြို့နယ် ငတတ်အိုင်ကျေးရွာနှင့် စဉ့်ကူးမြို့နယ်၊ချောင်းသလဲကျေးရွာကြားတွင် စစ်ကောင်စီတပ်အား ပူးပေါင်းအဖွဲ့များက မိုင်းအလုံးပေါင်း ၅၄ လုံး၊M9 လေးလုံး၊79 လေးလုံး ၊(၆၀) မမ ငါးလုံး၊ရှော့တိုက်ဒုံး နှစ်လုံးတို့ဖြင့် တိုက်ခိုက်ခဲ့ကြောင်း၊ တိုက်ခိုက်မှုများတွင် စစ်သား ၇ ဦးသေဆုံးပြီး ၃၀ဦးခန့် ပြင်းထန်ဒဏ်ရာရရှိခဲ့ကြောင်း ဗိုလ်လင်းယုန်တပ်ဖွဲ့က ပြောသည်။

“ကျောက်ကြီးဆေးရုံမှာ အခြားလူနာတွေဆင်းခိုင်းပြီး စစ်သားတွေချည့်ပဲ တင်ထားတယ်။ သေဆုံးတာတွေကို ချောင်းကြီးရဲကင်းမှာ ကားရပ်ပြီး ထမ်းချနေတာတွေ၊ တောထဲကစောင်ပခက်တွေနဲ့ထမ်းတာတွေမြင်ရတာ။”ဟု ဗိုလ်လင်းယုန်တပ်ဖွဲ့ခေါင်းဆောင် ကိုဇီးရိုးဝမ်းက ပြောသည်။

Public Service Announcement

တိုက်ပွဲအတွင်း စစ်ကောင်စီတပ်သားများရမ်းသမ်းပစ်ခတ်သည့် ကျည်ထိ၍ ချောင်းသလဲကျေးရွာရှိ နွားနှစ်ကောင်သေဆုံးပြီး နေအိမ်လေးလုံးမီးရှို့ခံခဲ့ရကြောင်း၊ ထို့အပြင် ကျေးရွာရှိနေအိမ်များအား ဝင်ရောက်ကာ တန်ဖိုးရှိပစ္စည်းများ ယူဆောင်သွားကြောင်း ဗိုလ်လင်းယုန်တပ်ဖွဲ့က ဆိုသည်။

ပူးပေါင်းအဖွဲ့များ ရှင်းလင်းရေးဝင်ရာတွင် (၆၀) မမ ဒလက်လေးခု၊(၄၀) မမကျည်ခွံနှစ်ခု၊Pading ကျည်တစ်ခုတို့ သိမ်းဆည်းရမိခဲ့ကြောင်း ၎င်းအဖွဲ့များက အသိပေးသည်။