စစ်ကိုင်းတိုင်းရှိ စစ်ကိုင်း၊ အရာတော်နှင့် ဝက်လက် မြို့နယ်တို့တွင် စစ်ကောင်စီတပ်နှင့်ပျူစောထီးများအား ဒရုန်းများ၊ ပဒေသာမိုင်းများဖြင့် တိုက်ခိုက်ခဲ့ရာ ထိခိုက်သေဆုံးမှုများကြောင်း ဒေသတွင်းသတင်းရင်းမြစ်များက ပြောသည်။
မတ်လ ၂၂ရက် ညနေ ၅နာရီခန့်က မုံရွာမှ အရာတော်မြို့နယ်သို့ စစ်ကောင်စီတပ်ဖွဲ့လိုက်ပါလာသော (၁၂)ဘီးယာဉ် ငါးစီးအနက် နှစ်စီးအား လွှတ်ပေးလိုက်ရာ လမ်းကြောရှင်းသည်အထင်ဖြင့် မောင်းနှင်လာသော (၁၂)ဘီးယာဉ်တစ်စီးအား မိုင်းပွိုင့်ရှေ့အရောက် ပဒေသာမိုင်း ခြောက်လုံးဖြင့် ဖောက်ခွဲတိုက်ခိုက်ခဲ့ကြောင်း၊ စစ်ကောင်စီတပ်သား သုံးဦးသေဆုံးပြီး အများအပြားဒဏ်ရာရသွားသည်ဟု သတင်းရကြောင်း သပြေညို ပြောက်ကျားတပ်ဖွဲ့ တာဝန်ခံက ပြောသည်။
အလားတူ ယမန်နေ့ (မတ်လ ၂၃ ရက်) နံနက် ၇နာရီကျော်က စစ်ကိုင်းမြို့နယ်၊ နုံးတွင်း ခြေတော်ရာတပ်မှ ထွက်လာသည့် စစ်ကောင်စီယာဥ်ငယ်တစ်စီးသည် ညောင်ပင်ဝန်းနှင့် နတ်ခရိုင်ကြား လယ်ကြီးလမ်းမပေါ်တွင်ရပ်တန့်ကာ မိုင်းရှင်းရန်ကြိုးစားစဉ် ဒေသတွင်း PDFအဖွဲ့များက မိုင်းဆွဲ တိုက်ခိုက်ခဲ့ကြောင်း စစ်ကိုင်းမြို့နယ် သတင်းမှန်ပြန်ကြားရေးအဖွဲ့က ထုတ်ပြန်သည်။
” ကားလမ်းပေါ် မိုင်းရှင်းဖို့ကြိုးစားနေတဲ့ စစ်ကောင်စီ စစ်သား သုံးဦး ရှေ့ကိုကျွံထွက်လာပြီး မိုင်းကွင်းပေါ်ရောက်လာချိန် ပဒေသာမိုင်း ငါးလုံးနဲ့ မိုင်းဆွဲတိုက်ခိုက်ခဲ့ကြတာဖြစ်ပြီး သုံးဦးလုံးသေဆုံးနိုင်ဖွယ်ရှိတယ်လို့သိရပါတယ်။”ဟု စစ်ကိုင်းမြို့နယ် သတင်းမှန်ပြန်ကြားရေးအဖွဲ့က ပြောသည်။
Public Service Announcement
မိုင်းဆွဲတိုက်ခိုက်ခံရပြီးနောက် အပြန်အလှန် ပစ်ခတ်ခဲ့ကြသော်လည်း PDFရဲဘော်များ ထိခိုက် မှုမရှိဟု ဆိုသည်။
အလားတူ မတ်လ ၂၃ ရက်ကပင် ဝက်လက်မြို့ မီးသတ်ရုံးတွင် ကင်းပုန်းဝပ်နေသော ပျူများကို တပ်ခွဲ (၁)က ဒရုန်းဖြင့် ဗုံးချတိုက်ခိုက်ခဲ့ရာ တစ်ဦးသေဆုံးပြီး ပျူနှစ်ဦးလည်း ထိခိုက်ဒဏ် ရာရရှိခဲ့ကြောင်း Eagle Guerrilla Force အဖွဲ့ တာဝန်ခံက ပြောသည်။
အရာတော်စစ်ဆင်ရေးကို သပြေညို ပြောက်ကျားတပ်ဖွဲ့၊ တောကျွဲကြီး ပြောက်ကျားတပ်ဖွဲ့နှင့် Ayadaw Falcon Force(AF2)တို့ကလည်းကောင်း၊ စစ်ကိုင်းစစ်ဆင်ရေးကို ဒေါင်းစစ်သည် sagaing region people’s defence force ၊ local defence force brotherhood of dragon ၊ မန္တလေးခရိုင် တပ်ရင်း (၆) တပ်ခွဲ (၃) တို့ကလည်းကောင်း ပူးပေါင်းတိုက်ခိုက်ခဲ့ကြောင်း အသိပေးထားသည်။
