ပဲခူးရိုးမဖြတ်ကျော်လမ်းပိုင်းများမှ တစ်ခုအပါအဝင်ဖြစ်သည့် မြို့ချောင်း – စိန်ကန့်လန့်လမ်းပိုင်းတွင် သာသယာဝတီခရိုင် PDF တပ်ရင်း (၃၈၀၂)၏ တပ်ခွဲများမှ ပူးပေါင်းစစ်ကြောင်းက လမ်းပိုင်းစစ်ဆေးမှုများလုပ်ဆောင်လျှက်ရှိကြောင်း ယနေ့(ဇူလိုင် ၁၆) အသိပေးထုတ်ပြန်သည်။
အဆိုပါလမ်းပိုင်းသည် ပဲခူးတိုင်းအနောက်ခြမ်း မင်းလှမြို့နယ် ရန်ကုန်-ပြည်လမ်းမှတဆင့် ပဲခူးရိုးမသို့ဖြတ်ကာ ရန်ကုန်-မန္တလေးလမ်းဟောင်းအပါအဝင် နေပြည်တော်အမြန်လမ်းမကြီးအထိ သွားရောက်နိုင်သော လမ်းပိုင်းတစ်ခုဖြစ်သည်။
“ဒီလမ်းပိုင်းက စစ်ရေးအရ အရေးပါတယ်။ ဒီလမ်းကနေ အမြန်လမ်းကို တက်လို့ရတယ်။ နေပြည်တော်အထိ တက်လို့ရတယ်။ စစ်ကောင်စီအတွက်လည်း ဝင်ငွေရတဲ့နေရာပေါ့။ ပြည်သူကတော့ ထိခိုက်မှုနည်းပါတယ်။ လိုအပ်သလို ရှောင်တခင် စစ်ဆေးတာကို အဓိက လုပ်ဆောင်မှာပါ”ဟု တပ်ရင်း(၃၈၀၂)၊ တပ်ခွဲ (၅)မှ တာဝန်ရှိသူတစ်ဦးက People’s Spring သို့ ပြောသည်။
အထက်ပါ မြို့ချောင်း – စိန်ကန့်လန့်လမ်းပိုင်းပါဝင်သည့် ပဲခူးရိုးမတကြောကို PDF တပ်ဖွဲ့များက စစ်ရေးနယ်မြေအဖြစ် မသတ်မှတ်မီ ပြီးခဲ့သည့် နှစ်လခန့်အထိ စစ်ကောင်စီက ရိုးမပေါ်မှ သစ်များခိုးထုတ်ခဲ့သည်မှာ အနည်းဆုံးသစ်တန်ချိန် (၁၀၀)ထက်မနည်းရှိခဲ့ပြီး ယခုနောက်ပိုင်းမှသာ သစ်ခိုးထုတ်မှုအရှိန်တန့်သွားကြောင်း ၎င်းတာဝန်ရှိသူက ရှင်းပြသည်။
Public Service Announcement
စစ်ကောင်စီသည် ပဲခူးရိုးမကိုအားကိုးပြု၍ သစ်များခိုးထုတ်ကာ ဝင်ငွေရှာဖွေနေခြင်းကို ရပ်တန့်ရန်နှင့် စစ်ရေးဖော်ဆောင်မှုအတွက် အရေးပါသည့်လမ်းပိုင်းတစ်ခုဖြစ်သောကြောင့် အထက်ပါ လမ်းပိုင်းစစ်ဆေးမှုလုပ်ဆောင်နေခြင်းကို ပြည်သူသို့ အသိပေးခြင်းဖြစ်ကြောင်း တပ်ခွဲ(၅)မှ တာဝန်ရှိသူက ဆက်ပြောသည်။
အထက်ပါ မြို့ချောင်း – စိန်ကန့်လန့်လမ်း၌ လမ်းပိုင်းစစ်ဆေးမှုများလုပ်ဆောင်စဥ် ခရီးသွားယာဥ်အချို့နှင့် ပြည်သူများအားတွေ့ရှိသည်တွင် ပြည်သူများက စစ်ဆေးမှုကို ကြည်ဖြူစွာလက်ခံကြပြီး ပူးပေါင်းဆောင်ရွက်မှုရှိကြောင်း သာယာဝတီခရိုင် တပ်ရင်း(၃၈၀၂)ထံမှ သိရသည်။
နောက်နောင်တွင်လည်း အဆိုပါ ရိုးမဖြတ်ကျော်လမ်းပိုင်းတွင် စစ်ရေးလှုပ်ရှားမှုများကို လိုအပ်သလိုလုပ်ဆောင်မည်ဖြစ်သောကြောင့် ပြည်သူများအနေဖြင့် စစ်ကောင်စီတပ်များနှင့်အတူ သွားလာခြင်း၊ အနီးတွင်နေထိုင်ခြင်းများ မပြုလုပ်ကြရန် သတိပေးထားသည်။
