ရန်ကုန်မြို့တွင်း တိုက်ခိုက်မှုတွေအပါအဝင် ၂ နှစ်အတွင်း မြို့တွင်း တိုက်ခိုက်မှုတွေမှာ စစ်ကောင်စီတပ်သား ၉၁ ဦးသေဆုံးခဲ့တယ်လို့ NUG အစိုးရ ကာကွယ်ရေးဝန်ကြီးဌာန လက်အောက်ခံ အထူးစစ်ဆင်ရေးအဖွဲ့ ( S.O.F ) က ဇူလိုင်လ ၂၁ ရက်မှာ အသိပေးလိုက်ပါတယ်။
အထူးစစ်ဆင်ရေးအဖွဲ့ ၂ နှစ်ပြည့်အနေနဲ့ ၂ နှစ်တာအတွင်း မြို့တွင်းစစ်ဆင်ရေး အကျဉ်းချုပ်ကိုဖော်ပြလာတာပါ။
အထူးစစ်ဆင်ရေးအဖွဲ့ဟာ ရန်ကုန် ၊ ပဲခူး ၊ မွန်ပြည်နယ်နဲ့ဧရာဝတီတိုင်းတို့မှာ လှုပ်ရှားခဲ့တယ်လို့ဆိုထားပါတယ်။
ရန်ကုန်မှာဆိုရင် ဗားကရာ ၊သန်လျင်တံတား၊ ထန်းတပင်တာဆုံ၊ လှိုင်သာယာဘုရားလမ်း၊ မြောက်ဥက္ကလာတံတား၊ ဗဟန်းစစ်တပ်အရာရှိရိပ်သာ၊ အင်းစိန်ထောင်အရာရှိရိပ်သာ တွေကို တိုက်ခိုက်ခဲ့တာ မိမိတို့ လက်ချက်ဖြစ်တယ်လို့ အထူးစစ်ဆင်ရေးအဖွဲ့က ပြောထားပါတယ်။
Public Service Announcement
ဒါအပြင် သာကေတရဲစခန်း ၊မြောက်ဥက္ကလာ ရဲစခန်း ၊ လှိုင်သာယာ ရဲစခန်း တွေကိုလည်း ပစ်ခတ် တိုက်ခိုက်တာတွေလုပ်ခဲ့တယ်လို့ ဆိုထားပါတယ်။
ဧရာဝတီတိုင်းမှာ စစ်ကောင်စီခန့် တိုင်းဝန်ကြီးချုပ်ယာဉ်တန်းကို ကြားဖြတ်ခိုက်ခဲ့ပြီး မွန်ပြည်နယ်မှာတော့ ရဲစခန်းတွေ ၊ စစ်ကောင်စီဂိတ်တွေကို မကြာခဏဝင်တိုက်တာတွေရှိခဲ့တယ်လို့ဆိုထားပါတယ်။
မြို့တွင်း တိုက်ခိုက်မှုမှာ စစ်ရေးပစ်မှတ်ကို တိုက်ခိုက်တာ ၁၇ ကြိမ် ၊ အုပ်ချုပ်ရေးပစ်မှတ် ၁၉ ကြိမ်နဲ့ စီးပွားရေး ပစ်မှတ် ၁၆ ကြိမ် ရှိခဲ့တယ်လို့ အထူးစစ်ဆင်ရေးအဖွဲ့က ဖော်ပြပါတယ်။
တိုက်ခိုက်ခဲ့တဲ့ နေရာအသေးစိတ်အချက်အလက်တွေကိုတော့ဖော်ပြတာမတွေ့ရပါဘူး။
