တန့်ဆည်မြို့သို့ စစ်​ကောင်စီတပ်နှင့် ပျူ ပူး​ပေါင်းစစ်​ကြောင်းထိုးလာ၍ ​ဒေသခံပြည်သူများထွက်​ပြေးတိမ်း​ရှောင်

တန့်ဆည်မြို့တွင် စစ်ကောင်စီတပ်မှအရာရှိအချို့အပါအဝင် ၂၀ ​ကျော် သေဆုံးခဲ့သည့် တိုက်ပွဲအပြီး တစ်လခန့်အကြာတွင် စစ်ကောင်စီတပ်နှင့် ပျူစောထီးပူးပေါင်းစစ်ကြောင်း ပြန်ဝင်လာ၍ ဒေသခံများ ဘေးလွတ်ရာထွက်‌​ပြေးတိမ်းရှောင်နေကြရကြောင်း ​ဒေသခံအချို့နှင့် ပျူများက​ပြောသည်။

တန့်ဆည်မြို့နယ်၊ ကာဘိုးဆည်ဘက်သို့ အောက်တိုဘာလ ၂၄ရက် နံနက်မှစ၍ ‌ စစ်ကောင်စီနှင့် ပျူစောထီး အင်အား ၁၀၀ ခန့် ဝင်လာခြင်းဖြစ်သည်။

“ပျူတွေပိုများပါတယ်။ကန့်ဘလူဘက်ကနေဝင်လာတာ။ လမ်းတ‌လျှောက်က ဒေသခံတွေကို ဘေးလွတ်ရာ တိမ်းရှောင်ခိုင်းထားရပါတယ်” ဟု ပြည်သူ့ကာကွယ်ရေးရဲဘော်တစ်ဦးကပြောသည်။

တန့်ဆည်မြို့နယ်တွင် ပြီးခဲ့သည့် စက်တင်ဘာလ ၂၂ရက်က ထွေအုပ်ရုံး၊ လဝကရုံးနှင့် ယင်းနေရာအနီးရှိ ဒေါင်းမင်းဆီဆိုင်တွင် တပ်စွဲထားသည့် စစ်ကောင်စီတပ်ကို ပြည်သူ့ကာကွယ်ရေးပူးပေါင်းတပ်ဖွဲ့များကတိုက်ခိုက်ခဲ့သည်။ ထိုတိုက်ပွဲတွင် စစ်ကောင်စီဘက်မှအရာရှိအချို့အပါအဝင် ၂၃ ဦးသေဆုံးပြီး လက်နက်ခဲယမ်းများလည်း သိမ်းဆည်းနိုင်ခဲ့သည်ဟု တော်လှန်ရေးအင်အားစုများကသတင်းထုတ်ပြန်ခဲ့သည်။

Public Service Announcement

အဆိုပါ တိုက်ပွဲအတွင်း ရွှေဘိုခရိုင်တပ်ရင်း(၆)မှ ပြည်သူ့ကာကွယ်ရေး ရဲဘော်တစ်ဦး ကျဆုံးခဲ့ပြီး စစ်ကောင်စီလေကြောင်းတိုက်ခိုက်မှုကြောင့် ကလေးငယ်တစ်ဦးအပါအဝင် အရပ်သားလေးဦး ဒဏ်ရာရခဲ့သည်။

ယင်းနောက်ပိုင်းတွင် စစ်ကောင်စီက ထွေအုပ်ရုံး၊ လဝကရုံးနှင့်ဒေါင်းမင်းဆီဆိုင်တို့၌ မနေတော့ဘဲ ရဲစခန်း၊ ဘောလုံးကွင်းနှင့် ‌စာသင်ကျောင်းများ၌သာ တပ်စွဲနေထိုင်​ကြောင်း ​ဒေသခံအချို့က​ပြောသည်။

” သူတို့က အဲ့ဒီနေရာပတ်ဝန်းကျင်မှာပဲနေပြီး အခုတခါ ပြန်ဝင်လာတာ”ဟု ပြည်သူ့ကာကွယ်ရေးရဲဘော်တစ်ဦးကပြောသည်။

စစ်ကောင်စီနှင့် ပျူစောထီးပူးပေါင်းစစ်ကြောင်းသည်ယနေ့နံနက်တွင် တန့်တည်မြို့့လမ်းဆုံ စျေးသစ်အနီးရှိ နေအိမ်အချို့နှင့်စာသင်ကျောင်းအချို့ကို မွှေနှောက်ပြီး မီးရှို့ ဖျက်ဆီးခဲ့ကြောင်းလည်း သိရသည်။