မန္တလေးတိုင်း၊ မတ္တရာမြို့နယ်အနောက်ခြမ်းတွင် စစ်ကောင်စီတပ်က ပြည်သူတစ်ဦးကို သတ်ဖြတ်ပြီး ကျေးရွာနှစ်ရွာအား မီးရှိူ့ဖျက်ဆီးသွားကြောင်းဒေသခံများကပြောသည်။
ယမန်နေ့ (ဇန်နဝါရီ ၂၈ ရက်) နံနက် ၅နာရီခွဲခန့်က မတ္တရာမြို့နယ်အနောက်ခြမ်းရှိ ပိုဝ၊ စိန်ပန်းကုန်း၊ဆင်ကုန်း၊သမင်ခြံ၊ သူဌေးကုန်းရွာများသို့ အင်အား ၈၀ခန့်ပါ စစ်ကောင်စီစစ်ကြောင်း ဝင်ရောက်ခဲ့သည်။
စစ်ကောင်စီတပ်သည် ဆင်ကုန်းကျေးရွာမှ အမျိုးသားတစ်ဦးကို ဖမ်းဆီးသတ်ဖြတ်ပြီး သူဌေးကုန်းနှင့် သမင်ခြံကျေးရွာရှိ နေအိမ်အချို့ကိုလည်း မီးရှို့ဖျက်ဆီးသွားကြောင်း ဒေသခံများက ပြောသည်။
ထိုစစ်ကြောင်း ဝင်ရောက်မွှေနှောက်ခဲ့၍ ကျေးရွာများရှိ ပြည်သူများထွက်ပြေးတိမ်းရှောင်ခဲ့ကြရပြီးစစ်ကောင်စီတပ်သည် ထိုကျေးရွာများမှ ပစ္စည်းများကိုလည်း ကားကြီးကားငယ်များဖြင့် သယ်ဆောင်သွားကြောင်း ဒေသခံများက ပြောသည်။
Public Service Announcement
“မတ္တရာဘက်က ရွာတွေကို မနေ့မနက်တည်းက စစ်ကြောင်းထိုးမီးရှို့နေတာ။စစ်ဘေးရှောင် ၂၀၀၀ ကျော်ပြီမတ္တရာက။”ဟု ဒေသခံတစ်ဦးက ပြောသည်။
ထို့အပြင် ထိုစစ်ကြောင်းက လက်နက်ကြီးဖြင့် ပစ်ခတ်ခဲ့၍ ရွာတန်းရှည်နှင့် မိုးကြိုးရွာဘက်သို့ လက်နက်ကြီးကျည်များကျရောက်ပေါက်ကွဲခဲ့ကြောင်း သိရသည်။
စစ်ကောင်စီတပ်သည် မတ္တရာမြို့နယ်တွင် ပြီးခဲ့သည့် နိုဝင်ဘာလလယ်က ပြည်သူ ၁၇ ဦး၊ဒီဇင်ဘာလ ၃၀ ရက်နေ့က ပြည်သူ ၇ ဦး စုစုပေါင်း ၂၄ ဦးကို ဖမ်းဆီးသတ်ဖြတ်ခဲ့သည်။
အခြားသတင်းတစ်ရပ်မှာဇန်နဝါရီလ ၂၇ ရက်နေ့ နံနက် ၁၁ နာရီ မိနစ် ၂၀ ခန့်က မတ္တရာမြို့နယ်၊ ရွှေချောင်းပျူရွာရှိ ပျူစောထီးများစုဝေးနေထိုင်သော ပျူခေါင်းဆောင်၏ နေအိမ်အား မြနန္ဒါစစ်ဆင်ရေး(မန္တလေး)နှင့် ဒေသတွင်းPDFများက ဒရုန်းဖြင့် ဗုံးသီး ၄ လုံးချ၍ တိုက်ခိုက်ခဲ့သည်။
