“လက်ရှိ စစ်အုပ်စုနဲ့ ဆက်ဆံနေတဲ့နိုင်ငံရေးပါတီတွေကလည်း စစ်အုပ်စု ထားရာနေ၊ စေရာသွား အစီအမံနဲ့ သွားနေကြတာ”

လက်တွေ့နိုင်ငံရေးအခြေအနေအရ နိုင်ငံရေးပါတီတွေရဲ့ အခန်းကဏ္ဍ ဘာမှမရှိတော့ဘူး၊ လက်ရှိ စစ်အုပ်စုနဲ့ ဆက်ဆံနေတဲ့နိုင်ငံရေးပါတီတွေကလည်း စစ်အုပ်စု ထားရာနေ၊ စေရာသွား အစီအမံနဲ့ သွားနေကြတာဖြစ်တယ်လို့ လူ့ဘောင်သစ်ဒီမိုကရက်တစ်ပါတီဿက္ကဌ ဦးအောင်မိုးဇော်က ပြောပါတယ်။

“အာဏာကို အဓမ္မရယူထားတဲ့ စစ်အုပ်စုလက်အောက်မှာ စစ်အုပ်စုကခန့်အပ်ထားတဲ့ကော်မရှင်နဲ့ ကျွန်တော်တို့ဆက်စပ်ပြီးတော်အလုပ်လုပ်ဖို့အကြောင်းမရှိဘူး။
သူတို့နဲ့ဆက်စပ်ပြီးတော့အလုပ်လုပ်တာဟာ တနည်းအားဖြင့် နိုင်ငံရေးပါတီတစ်ခုအနေနဲ့ စစ်အုပ်ချုပ်ရေးကို လက်ရှိအာဏာကိုအဓမ္မရယူထားတာကို အသိအမှတ်ပြောတဲ့သဘော သက်ရောက်တယ်။ ဒါကြောင့် စစ်အုပ်စုသော်လည်းကောင်း စစ်အုပ်စုက ခန့်အပ်ထားတဲ့ကော်မရှင်နဲ့သော်လည်းကောင်း ဆက်စပ်ပြီးအလုပ်လုပ်စရာမရှိဘူး” လို့ ဦးအောင် မိုးဇော်က ပြောပါတယ်။

ဒီကနေ့ အောက်တိုဘာ ၁၄ ရက်ဟာ လူ့ဘောင်သစ်ဒီမိုကရက်တစ်ပါတီ တည်ထောင်တဲ့ ၃၃ နှစ်ပြည့်နှစ်ပြည့်ဖြစ်ပါတယ်။ လူ့ဘောင်သစ်ဒီမိုကရက်တစ်ပါတီဥက္ကဌ ဦးအောင်မိုးဇော်ကို လူထုနွေဦးသတင်းဌာနက ဆက်သွယ်မေးမြန်းထားပါတယ်။