“ရန်ကုန်မြို့လယ်မှာ စစ်​ကောင်စီကိုနားရွက်တံ​​တွေးဆွတ်သူများ”

အာဇာနည်နေ့မတိုင်မီ ဇူလိုင်လ ၁၈ ရက်နေ့ ညနေပိုင်းက ရန်ကုန်မြို့ရှိ ” နဝင်း “ဟု ၎င်းတို့ အမည်ပေးထားသည့်အစည်းအဝေးခန်းမတွင် လူငယ်အချို့ ရောက်ရှိပြီး နာရီပိုင်းအတွင်း ပြုလုပ်မည့် အစီအစဥ်တစ်ခုအတွက် တိုင်ပင်နေကြသည်။

ထိုလူငယ်များသည် Youth Association Of Thingangyun (YAT)၊ အခြေခံပညာကျောင်းသားလူငယ်များအစည်းအရုံး(အကလ-မြေပြင်)၊ Labour Alliance အဖွဲ့ဝင် (CTUM)၊ စမ်းချောင်းပင်မ သပိတ်စစ်ကြောင်း နှင့် Revolution Force (RF) မှတာဝန်ခံသပိတ်ခေါင်းဆောင်များဖြစ်သည်။

ထိုလူငယ်များသည် ရန်ကုန်မြို့ပေါ်တွင်စစ်အာဏာရှင်အား ဆန့်ကျင်​ကြောင်း သပိတ်စစ်ကြောင်းထွက်ကာ ဆန္ဒထုတ်ဖော်ရန် စီစဥ်နေခြင်းဖြစ်သည်။

စစ်ကောင်စီတပ်က ဆန္ဒပြလူငယ်များအား တွေ့သည်နှင့် အကြမ်းဖက်ဖမ်းဆီးသတ်ဖြတ်နေချိန်မို့ သပိတ်အဖွဲ့ဝင်များအား အထိအခိုက်နည်းနိုင်သမျှ နည်းစေရန် ကြိုတင်ပြင်ဆင်နေကြခြင်းဖြစ်သည်။ ပိုပြီး အန္တရာယ်များစေသည်က မြို့ပြ၏ CCTV ယဥ်ကျေးမှုကြီးဖြစ်သည်။

“အဓိကစိန်ခေါ်မှုကတော့ CCTV တွေပဲဖြစ်ပါတယ်။CCTV အများဆုံးနေရာဖြစ်တဲ့အတွက် CCTV မှတ်တမ်းတွေကိုဖျက်ပေးဖို့ ” မြို့ပြကို CCTV နဲ့မသတ်နဲ့ ” အမည်ရကမ်ပိန်းနဲ့လူထုကို ကြိုတင်သတင်းစကားပါးထားပြီး တကယ်လို့ CCTV မှာပါခဲ့ရင်လည်း ခြေရာကောက်လို့မရအောင် ရုပ်ဖျက်ခြင်း၊သွားလာရေးလမ်းကြောင်းများဖြတ်တောက်ခြင်း အစရှိတဲ့နည်းနာတွေနဲ့ CCTV ကနေတာဝန်ယူထောက်လှမ်းနေရတဲ့ဖရဲသီးရဲတွေဆီကနေရရှိတဲ့ နည်းနာတွေကိုပါပေါင်းစပ်အသုံးပြုခဲ့ပါတယ်။”ဟု ကိုရေဘဝဲက ပြောသည်။

ထို့အပြင် ၎င်းတို့ရွေးချယ်ထားသည်က ရန်ကုန်မြို့လယ်ခေါင် လသာမြို့နယ်တရုတ်တန်းအနီးဖြစ်သည်။လသာရဲစခန်းနှင့် လမ်းမတော်ရဲစခန်းကြားတွင်မှ ဆန္ဒပြရန် စီစဥ်ခဲ့ကြခြင်းပင်။

အစည်းအဝေးခန်းထဲရှိ အမျိုးသမီးတစ်ဦးက “သပိတ်ဖော်ဆောင်မယ့်နေရာဟာ CCTV အများဆုံးနေရာဖြစ်တဲ့အတွက် လိုအပ်တဲ့ရုပ်ဖျက်မှုတွေ၊အသွားအလာလမ်းကြောင်းဖြတ်တောက်မှုတွေ ကိုအားလုံးပြင်ဆင်ကြပြီးပြီးလို့ယုံကြည်ပါတယ်ရှင်”ဟု ​ပြောသည်။​

ထိုလူငယ်များသည် သပိတ်တစ်ခုဖော်ဆောင်မည်ဆိုပါက ရန်ကုန်မြေပြင်အခြေအနေပေါ်မူတည်ပြီး မြို့နယ်အနေအထားနှင့် စစ်ကောင်စီရဲ့ လုံခြုံရေးအနေအထားများကို လေ့လာမှု၊စစ်ဆေးမှု၊ကြိုတင်ပြင်ဆင်မှုများ အကြိမ်ကြိမ်ပြုလုပ်လေ့ရှိကြောင်း ကိုရေဘဝဲက ပြောသည်။

ကိုရေဘဝဲတို့သည် ခေတ်လူငယ် Z မျိုးဆက်များဖြစ်သော်လည်း ဗေဒင်၊နက္ခတ်၊တားရော့ အစရှိသည့် ပညာရပ်များကို ဝါသနာပါ၍ လေ့လာ၊ တတ်မြောက်ကြသည့် လူငယ်သပိတ်ရဲဘော်များလည်း အများအပြားရှိနေသည်။

သပိတ်ထွက်မည့်နေရာကို အတိအကျစီစဥ်ပြီးသည့်နောက် ထိခိုက်မှုအနည်းဆုံးနှင့် အောင်မြင်မှုအများဆုံး သပိတ်တိုက်ပွဲဖော်ဆောင်မည့် နေ့ရက်နှင့်အချိန်ကို တိုင်ပင်တွက်ဆကြသည်။ပေါင်းခြင်းနံမှတ် ၂ ၊ ၉ ၊ ၁၀ သုံးခုထဲမှ ရက်တစ်ရက်ကို ​တား​ရော့ကတ်ပြား ​​ဗေဒင်ဖြင့်ပါ ရွေးရာတွင် ​ ၉ ဂဏန်းကို​ရွေးချယ်ခဲ့ကြသည်။

သပိတ်အတွေ့အကြုံ များ နှင့် တားရော့ကတ်ပြား၏ ဟောပြောတွက်ချက်မှုကြောင့် အာဇာနည်နေ့မတိုင်မီ ဇူလိုင်လ ၁၈ ရက်နေ့ (​ပေါင်းခြင်း)ကို ရွေးချယ်ခဲ့ကြောင်း ၎င်းတို့က ပြောသည်။

ထို့နောက် မြေပြင်သပိတ်ဆင်နွှဲကြမည့် အဖွဲ့ဝင်များက ဆက်လက်ဆွေးနွေးကြသည်။မြေပြင်ကင်းထောက်ပိုင်းကိုတာဝန်ယူထားသော RF တာဝန်ခံက “သပိတ်မစမီ ရန်သူသတိထားမိအောင် စုစု စုစုလုပ်မနေကြဖို့လည်းလိုအပ်ပါတယ်။ “ဟု အကြံပြုသည်။

Labour Alliance အဖွဲ့ဝင် (CTUM)တာဝန်ခံကလည်း ” အရပ်ဝတ်တွေနဲ့ စတစ်ကာအမဲကပ်ထားတဲ့ အိမ်စီးကားတွေလည်း သတိပြုကြမယ်နော် “ဟု သတိ​ပေးသည်။

ထို့နောက် ကိုရေဘဝဲက ” အောင်အောင်မြင်မြင်ကြွေးကြော်ပြီးသွားရင် မီးတုတ်တွေကိုလမ်းလယ်ကျွန်းဘက်ကပ်ချထားခဲ့ပါခင်ဗျာ။လမ်းဘေးစျေးသည်ပြည်သူတွေ အလန့်တကြားနဲ့ထိခိုက်မိမှာစိုးရိမ်စရာပါ။ဒီတခေါက်လည်းထုံးစံအတိုင်း လက်နက်မဲ့လူထုလှုပ်ရှားမှုနဲ့ စကစနားရွက် တံ​တွေးဆွတ်ကြစို့ရဲ့ခင်ဗျာ။ကဲ သပိတ်စထွက်မယ့်ပွိုင့်ကိုရောက်ဖို့ (၅) မိနစ်အချိန်ရပါမယ်ဗျို့ “ဟု ဆိုလိုက်သည်။

ထိုနောက် သပိတ်အဖွဲ့ဝင်များ မြို့လယ်ထွက်ရန် ပြင်ဆင်ကြလေပြီ။ ညနေ ၆ နာရီကျော်မှာတော့တရုတ်တန်း၊ လမ်းမတော်ရဲစခန်းနှင့် လသာရဲစခန်းကြားတွင် မီးတုတ်များကိုင်ဆောင်ကာ လူငယ်များအလျှိုလျှို ဖြင့်ထွက်လာကြချေပြီ။

သပိတ်တပ်ဦးအလံ အနီရောင်အောက်ခံပိတ်စတွင် ” လူမျိုးကြီးဝါဒတိုက်ဖျက်ကြ အာဇာနည်ဟာ (၉) ဦးမက ” ဟူသည့်စာသားအားအဖြူရောင်ဖြင့် ဆန်းသစ်စွာရေးချယ်ထားကြသည်။

“လူမျိုးကြီးဝါဒတိုက်ဖျက်ကြဟေ့၊ ဖက်ဒရယ်ဒီမိုကရေစီရရှိရေး ဒို့အရေးဒို့အရေး၊သပိတ်သပိတ် မှောက်မှောက်၊ မင်းအောင်လှိုင်မင်းအောင်လှိုင် မအေ-ိုးမအေ-ိုး” စသည့်ကြွေးကြော်သံများအကြား လမ်းဘေးစျေးသည်များနှင့် တရုတ်တန်းအနားရှိလူထုတရပ်လုံးမှာ ငေးကြည့်နေကြသည်။

အင်္ကျီအဖြူ၊ပုဆိုးဝတ်ဆင်ထားသော YAT မှသပိတ်တာဝန်ခံတစ်ဦးက”ကျဆုံးလေပြီးသောအာဇာနည်ခေါင်းဆောင်ကြီးများနှင့်တကွ အာဇာနည်အပေါင်းအား အလေးပြု ” ဟု ဆော်သြလိုက်သည်နှင့် သပိတ်ရဲဘော်များနှင့် အနီးဝန်ကျင်ရှိလူထုမှာ လက်သီးကျစ်ကျစ်ပါအောင်ဆုပ်၍ အံကိုကြိတ်ကာဦးညွှတ်လျက်။

ထို့နောက် စက္ကန့်ပိုင်းခန့်ငြိမ်သက်ပြီးသည်နှင့် “အရေးတော်ပုံ အောင်ရမည်၊အရေးတော်ပုံ အောင်ရမည်၊အရေးတော်ပုံ အောင်ရမည်” ဟုကြွေးကြော်သံဖြင့်ပိတ်ကာ အောင်မြင်စွာလူစုခွဲကြသည်။

ထို​နောက်လူငယ်များမှာကြိုတင်စီစဥ်ထားသည့်လမ်းကြောင်းများအတိုင်း တည်တည်ငြိမ်ငြိမ်ဖြင့်ကိုယ်ယောက်ဖျောက်ကာ ရဲရဲလျှောက်လှမ်းသွားခဲ့ကြသည်။

ထိုအရောင်စုံ၊လူမျိုးစုံ လူငယ်များရဲရဲလျှောက်လှမ်းနေကြသည့်လမ်းမှာ ဖက်ဒရယ်လမ်းမှလွဲ၍ မည်သည့်လမ်းမှမဖြစ်နိုင်ကြောင်း ကိုရေဘဝဲက ဆိုပါသည်။

“နဝင်း “ဟုအမည်ပေးပြီး နဝင်းဓာတ်ယူကာ လသာရဲစခန်းနှင့် လမ်းမတော်ရဲစခန်းကြား တရုတ်တန်းအနီး လူစည်ကားရာမြို့လယ်တွင် ပြုလုပ်ခဲ့သည့် သပိတ်ကတော့ အောင်မြင်စွာပြီးဆုံးခဲ့ပါသည်။

“ဒါဟာ အကြမ်းဖက်စစ်ကောင်စီကို “ခင်ဗျားတို့အနေနဲ့ ရန်ကုန်ကိုအုပ်ချုပ်လို့မရဘူး” ဆိုတာ လက်နက်မဲ့ သပိတ်တိုက်ပွဲလှုပ်ရှားမှုနဲ့ ထင်ဟပ်ပြသလိုက်တာပါပဲ”ဟု ကိုရေဘဝဲက ပြောပါသည်။

လုံခြုံ​ရေး တင်းကျပ်ထားသည်ဆို​​သောရန်ကုန်မြို့လယ်တွင် မီးတုတ်များကိုင်၍ ဆန္ဒပြ​ကြွေး​ကြော်​နေ​​သော လူငယ်များ၏ ရုပ်သံဖိုင်ကို ​ရေဘဝဲ ​ဖေစ်ဘွခ်စာမျက်နှာမှတစ်ဆင့် အာဇာနည်​နေ့ နံနက်အ​စောပိုင်းတွင် ထုတ်ပြန်လိုက်ရာ အချိန်တိုအတွင်းလျှင်မြန်စွာပျံ့နှံ့သွားသည်။ပြည်သူလူထုထံမှ အံသြဝမ်း​မြောက်မှုဖြင့် သပိတ်တိုက်ပွဲမှ လူငယ်များအ​ပေါ်အား​ပေးမှုများ ဇူလိုင် ၁၉ ရက်တွင် ပဲ့တင်ထွက်လာသည်။နားရွက် တံ​​တွေးဆွတ်ခံရ​​​သော စစ်​ကောင်စီက ဆန္ဒပြရာအနီးရှိ CCTV များမှတစ်ဆင့်ခြေရာခံရန်ကြိုးစားသည်။

သို့​သော် ​နောက်ကျသွား​ပါပြီ။သပိတ်တိုက်ပွဲမှရဲဘော်တွေအားလုံး လုံခြုံဘေးကင်းရာသို့​ရောက်​နေကြပြီဖြစ်​လေသည်။