'/%3E%3C/svg%3E){kind=small}
ဒီပဲယင်းမြို့နယ် ဆပ်ပြာကျင်းရွား အနီးတွင် ဇူလိုင် ၂ရက်က ဖြစ်ပွားခဲ့သည့် တိုက်ပွဲတွင် ပြည်သူ့ကာကွယ်ရေးတပ်ဖွဲ့(PDF) ရဲဘော် ၂၆ဦး ကျဆုံးပြီး ၅၀ဦးထက်မနည်း ထိခိုက်ဒဏ်ရာ ရရှိခဲ့ဟု ဒီပဲယင်း PDFက ယနေ့ ညနေပိုင်းတွင် သတင်းထုတ်ပြန်သည်။
” တိုက်ပွဲအတွင်းတွင် ကျဆုံးသွားသော အာဇာနည်သူရဲကောင်းများအားလုံးအတွက် မြို့နယ် PDF အဖွဲ့ဝင်များမှ အထူးဝမ်းနည်း ကြေကွဲရပါသည်။ကျဆုံးသွားသော အာဇာနည်သူရဲကောင်းများ ကောင်းရာသုဂတိလားပါစေ”ဟု ဒီပဲယင်း PDFက ထုတ်ပြန်သည်။
စစ်ကောင်စီတပ်များ ဝင်ရောက်လာ၍ ဆပ်ပြာကျင်းရွာ အပါအဝင် အနီးတဝိုက်ရွာများမှ ဒေသခံများ ထွက်ပြေးတိမ်းရှောင်ရာ စစ်ကောင်စီတပ်က လက်နက်ကြီးများဖြင့် ပစ်ခတ်ခဲ့၍ ဒီပဲယင်း PDFက ပြန်လည်ခုခံရာမှ တိုက်ပွဲ ဖြစ်ပွားခဲ့ဟု ဒေသခံ တစ်ဦးက ပြောသည်။
သို့ရာတွင် လက်နက်အင်အားမမျှ၍ PDFများ အထိနာခဲ့ရဟု ဒေသခံက ပြောသည်။ ကျဆုံးသူများထဲတွင် လက်နက်ကြီး ကျည်ထိမှန် ဒဏ်ရာရ၍ ကျန်ခဲ့သူများ ၊ ပုန်းအောင်းနေသူများ ပါဝင်ပြီး စစ်ကောင်စီတပ်က စစ်ကြောင်းထိုးဝင်ရောက်စဉ် တွေ့ရှိပြီး ပစ်သတ်ခံရခြင်းဖြစ်ဟု ဒေသခံက ပြောသည်။
