ကရင်အမျိုးသားအစည်းအရုံး(KNU) တပ်မဟာ(၅)က လွန်ခဲ့သည့် တစ်လခန့်က ဖွင့်လှစ်ပေးခဲ့သည့် ဖာပွန်- ကမမောင်း လမ်းပိုင်းကို ဇူလိုင် ၂၀ရက်ကစ၍ ပြန်လည်ကန့်သတ်ပိတ်ပင်လိုက်ကြောင်း ယနေ့ထုတ်ပြန်သည်။
စစ်ရေးအခြေအနေအရ ပိတ်ထားသည့် အဆိုပါလမ်းကို လူထု၏ သွားလာရေးနှင့် စားနပ်ရိက္ခာသယ်ယူပို့ဆောင်ရေးအတွက် ဇွန်လ ၁၉ရက်တွင် ဖွင့်လှစ်ပေးခဲ့သည်။
ယင်းလမ်းပြန်ဖွင့်ပေးပြီးနောက် စစ်ကောင်စီအုပ်ချုပ်ရေးအဖွဲ့၏ မြို့မှ တက်လာသည့် ဝန်ထမ်းများတွင် COVID-19 ရောဂါကူးစက်ပါလာသဖြင့် ဖာပွန်မြို့တွင် ယခင်က ကူးစက်မှုမရှိခဲ့သည့် ကပ်ရောဂါသည် ယခုအခါ ၁၀၀ ခန့်ရှိလာကြောင်း တပ်မဟာ(၅)က ထုတ် ပြန်သည်။
ထို့ကြောင့် ရောဂါကူးစပ်မှု ထပ်မံမတိုးပွားရန်နှင့် လျော့ ကျပြီး ပျောက်ကွယ်သွားရန်၊ ရောဂါကာကွယ်တားဆီးရန် တစ်မြို့နှင့်တစ်မြို့၊ တစ်ရွာနှင့်တစ်ရွာ သွားလာခြင်းအား ကန့်သတ်တားမြစ်ရန်လိုအပ်ကြောင်း၊ ထို့ကြောင့် ဇူလိုင် ၂၀ရက်မှစ၍ ဖာပွန်-ကမမောင်းလမ်းပိုင်းအား ကန့်သတ်ပိတ်ပင်လိုက်ကြောင်း KNU တပ်မဟာ(၅)က ဆိုသည်။
Public Service Announcement
ထိုသို့ ပိတ်ပင်ထားသည့် လမ်းကို မည်သူမျှမသွားမလာရန် နှင့် အကယ်၍ မလိုက်နာဘဲ သွားလာခဲ့၍ တစ်စုံတခု ဖြစ်ခဲ့ပါက တာဝန်ယူမည်မဟုတ်ကြောင်း၊ လမ်းပိုင်းပိတ်ပင်ကန့်သတ်မှုသည် နောက်ထပ် အမိန့်မထုတ်ပြန်မချင်း အသက်ဝင်နေမည်ဖြစ်ကြောင်း ထုတ်ပြန်ချက်၌ ဖော်ပြထားသည်။
အဆိုပါ ဖာပွန်-ကမမောင်းလမ်းပိုင်း ပြန်လည်ဖွင့်လှစ်ပြီးနောက် စစ်ကောင်စီတပ်နှင့် ၎င်း၏ လက်အောက်ခံ နယ်ခြားစောင့်တပ်ဖွဲ့တို့က KNU တပ်မဟာ(၅)နယ်မြေသို့ စစ်ရေးလှုပ်ရှားမှုများ တိုး၍ ပြုလုပ်လာ၍ တိုက်ပွဲများ ယခင်ထက် ပိုမိုဖြစ်ခဲ့ကြောင်း တပ်မဟာ(၅) ပြောရေးဆိုခွင့်ရှိသူ ဒုဗိုလ်မှူးကြီးစောကလယ်ဒိုက ပြောကြားထားသည်။
