အကြမ်းဖက်မှုတွေရပ်တန့်ရေးနဲ့ ဒီမိုကရေစ်လမ်း ကြောင်းပေါ်ပြန်သွားရေး ကုလသမဂ္ဂလုံခြုံရေးကောင်စီက မြန်မာစစ်တပ်ကိုဖိအားပေးဖို့ အမေရိကန်အကြီးတန်းသံတမန်တစ်ဦးက တိုက်တွန်းပြောဆိုပါတယ်။
မနေ့က ကုလသမဂ္ဂဆိုင်ရာ ဗြိတိန်သံအမတ်ကြီး ကမကထပြုကျင်းပတဲ့ လုံခြုံရေးကောင်စီရဲ့ မြန်မာ့အရေး အလွတ်ဆွေးနွေးပွဲမှာ အမေရိကန်အကြီးတန်းသံတမန်က ထည့်သွင်းပြောဆိုခဲ့တာဖြစ်ပါတယ်။
“ကျွန်တော်တို့ ကြန့်ကြာလေလေ၊ လူတွေ ပိုသေလေလေပါပဲ” လို့ ကုလဆိုင်ရာ အမေရိကန်ဒုတိယသံအမတ် Jeffrey DeLaurentis က ပြောပါတယ်။
အာဏာသိမ်းတဲ့ လွန်ခဲ့တဲ့ ၆ လက စလို့ မြန်မာစစ်တပ်ရဲ့ လူမဆန်မှုနဲ့ စီမံခန့်ခွဲမှုကျရှုံးမှုတွေရဲ့ တိုက်ရိုက်အကျိုး ရလဒ်ကြောင့် မြန်မာဟာ ကိုဗစ်လူနာတွေ့ရှိမှု တစ်ရှိန်ထိုးတက်ခဲ့ပြီး ဆိုးရွားတဲ့ကျန်းမာရေးကပ်ဘေးကို ရင်ဆိုင် နေရတာ ဖြစ်တယ်လို့ အမေရိကန်သံအမတ်က ဆက်ပြောပါတယ်။
Public Service Announcement
စစ်တပ်ရဲ့ အကြမ်းဖက်မှုနဲ့ နှိမ်နင်းမှုတွေရဲ့ နောက်ဆက် တွဲအဖြစ် ပြည်သူ သိန်းနဲ့ချီကာ ထွက်ပြေးတိမ်းရှောင် နေရပြီး နောက်ထပ် ပြည်သူ ၂ ဒသမ ၈ သန်းလောက်အထိ အစာရိက္ခာပြတ်လပ်မှုနဲ့ ရင်ဆိုင်ရနိုင်တယ်လို့ သူက ဆက်ပြောပါတယ်။
အွန်လိုင်းက ကျင်းပတဲ့ ကုလလုံခြုံရေးကောင်စီရဲ့ အဲဒီအလွတ်ဆွေးနွေးပွဲကို ကုလဆိုင်ရာ မြန်မာသံအမတ်ကြီး ဦးကျော်မိုးထွန်း၊ NUG ရဲ့ အမျိုးသမီး၊ လူငယ်နှင့် ကလေးသူငယ်ရေးရာဝန်ကြီး နော်ဆူဇန်နာလှလှစိုးနဲ့ ကချင်ကြားဖြတ်နိုင်ငံရေးပူးပေါင်းဆောင်ရွက်ရေးအဖွဲ့(KPICT)အထွေထွေအတွင်းရေးမှူး ဂွမ်ဆန်းအဲန်စန်းတို့လည်း ပါဝင်တက်ရောက်ခဲ့ပါတယ်။
