မြန်မာ့အရေး ကြားဝင်ဖြေရှင်းပေးဖို့ အထူးသံတမန်အဖြစ် အာဆီယံနိုင်ငံတွေက ခန့်အပ်လိုက်တဲ့သူကို သဘောတူလက်ခံတဲ့ကြောင်း အာဏာသိမ်းစစ်ကောင်စီက ထုတ်ပြန်လိုက်ပါတယ်။
အာဆီယံ အထူးသံတမန်အဖြစ် ဘရူနိုင်း နိုင်ငံခြားရေး ဒုတိယ ဝန်ကြီး Erywan Yusof ကို ခန့်အပ်လိုက်တာပါ။
ဒီလိုအထူးသံတမန် ခန့်အပ်ဖို့အတွက် ပြီးခဲ့တဲ့ ဧပြီလအတွင်းက အာဆီယံအဖွဲ့ဝင်နိုင်ငံတွေကြား သဘောတူညီခဲ့ကြပေမယ့် လအနည်းငယ်အကြာ အခုမှ ခန့်အပ်နိုင်တာလည်းဖြစ်ပါတယ်။
အာဆီယံ က ခန့်အပ်လိုက်တဲ့ အထူးသံတမန်ကို လက်ခံတယ်လို့ စစ်ကောင်စီဘက်က ဆိုထားပါတယ်။
Public Service Announcement
အဲဒီအထူး သံတမန် Erywan Yusof ဟာ အာဆီယံ ဘုံသဘောတူညီချက် ငါးချက်အပေါ် မူတည်ပြီး မြန်မာ့အရေးကိုကြားဝင် ဆောင်ရွက်သွားမယ်လို့ အာဆီယံ က ထုတ်ပြန်ထားပါတယ်။
မြန်မာ့အရေးနဲ့ပတ်သက်ပြီး ပြီးခဲ့တဲ့ ဧပြီလအတွင်း အာဆီယံ ခေါင်းဆောင်တွေ အင်ဒိုနီးရှားနိုင်ငံမှာတွေ့ဆုံကာ ဘုံသဘောတူညီချက် ငါးချက်ကို သဘောတူညီခဲ့တာပါ။
အဲဒီအချက်တွေထဲမှာ အထူးသံတမန်ခန့်အပ်ဖို့ပါဝင်သလို အကြမ်းဖက်မှုတွေ ချက်ချင်းရပ်ဖို့ ၊ မြန်မာနိုင်ငံအတွင်းက အခြေအနေတွေကို သက်ဆိုင်ရာ အင်အားစုအဖွဲ့အစည်းတွေတွေ့ဆုံ ဆွေးနွေးဖို့ အချက်တွေပါဝင်ပါတယ်။
အထူးသံတမန် Erywan Yusof ဟာ မြန်မာနိုင်ငံကို ဘယ်အချိန်မှာ လာရောက်မလဲ ဆိုတာကိုတော့ ထုတ်ပြန်ထားတာမရှိသေးပါဘူး။
