စစ်ကိုင်းတိုင်း ကနီမြို့နယ်မှ ကျဆုံးခဲ့သည့်အပြစ်မဲ့ပြည်သူ ၁၂ ဦး၏ အချက်အလက်များထပ်မံရရှိ၍ စစ်အာဏာရှင် တော်လှန်ရေး (နွေဦးတော် လှန်ရေး) ကာလအတွင်းကျဆုံးခဲ့ရသူ စုစုပေါင်းမှာယမန်နေ့အထိ ၉၆၀ ဦး ရှိပြီဖြစ်ကြောင်း နိုင်ငံရေးအကျဉ်းသား များ ကူညီစောင့်ရှောက်ရေးအသင်း (AAPP)က ယနေ့ထုတ်ပြန်သည်။
အဆိုပါအရေအတွက်သည် AAPP မှ ကောက်ယူရရှိထားသည့် အရေအတွက်ဖြစ်ပြီး ထိုအရေအတွက်ထက် ပိုများနေနိုင်သည်ဟု ထုတ်ပြန်သည်။
ဖေဖော်ဝါရီ ၁ ရက်မှ ယနေ့ (သြဂုတ် ၇ ရက်)အထိ ဖမ်းဆီးချုပ်နှောင်ခြင်းခံထားရသူ စုစုပေါင်း ၅၅၁၂ ဦးရှိပြီး ၎င်းတို့အနက်မှ ၂၅၅ ဦးမှာ ထောင်ဒဏ်ချမှတ်ခြင်းခံထားရသည်ဟု ဖော်ပြထားသည်။
ထိုပြစ်ဒဏ်ကျခံရသူထဲမှ အသက် ၁၈ နှစ်အောက် ကလေးနှစ်ဦး အပါအဝင် ၂၆ ဦးမှာ သေဒဏ်ချမှတ်ခံထားရ သည်။ ထို့အပြင် ဖမ်းဝရမ်းထုတ်ခြင်းခံထားရသောကြောင့် တိမ်းရှောင်နေသူ ၁၉၈၄ဦးရှိရာ ၎င်းတို့အနက်မှ မျက်ကွယ် သေဒဏ်ချမှတ်ခြင်းခံထားရသူ ၃၉ ဦး အပါအဝင် ၁၁၈ ဦးမှာမျက်ကွယ် ပြစ်ဒဏ်ချမှတ်ခြင်းခံထားရ၍ သေဒဏ်ချမှတ်ခံထားရသူ စုစုပေါင်း၆၅ဦးရှိပြီဟု ဖော်ပြထားသည်။
ယမန်နေ့ (သြဂုတ် ၆ရက်) က ကယားပြည်နယ် လွိုင်ကော်မြို့ရှိ ကယန်းသာယာစစ်ဆေးရေးဂိတ်တွင် အကြမ်းဖက်စစ်တပ်မှ ကယန်းသာယာကျေးရွာမှ ရွာသားသုံးဦးကို PDF နှင့်ဆက်နွယ်မှုရှိသည်ဟူသော သံသယဖြင့် ဖမ်းဆီးသွားခဲ့ပြီး အဆိုပါရွာသား သုံးဦးမှာ ခွန်ငြိမ်းချမ်း၊ ခွန်ဘေ၊ ခွန်ဖိုးအိုတို့ဖြစ်ကြသည်။
၎င်းတို့၏ လက်ကိုင်ဖုန်းများကို စစ်ဆေးခဲ့ပြီးနောက် ဖမ်းဆီးသွားခဲ့ခြင်းဖြစ်သည်ဟု ဆိုသည်။ ထို့အပြင်ကချင်ပြည်နယ် မိုးညှင်းမြို့တွင် သပိတ်ဦးဆောင်သူဟုစွပ်စွဲခြင်းခံရပြီး ဇွန်လ ၂၄ ရက်ကတည်းက ဖမ်းဆီးခြင်းခံထားရသော အကဆရာတစ်ဦးဖြစ်သည့် ကိုဝေယံထွန်း(ခ)မျိုးမျိုးကို အကြမ်းဖက်စစ်အုပ်စုမှ ရာဇသတ်ကြီးပုဒ်မ ၅၀၅(က) ဖြင့် ဇူလိုင်၃၁ ရက်တွင် အမှုဖွင့်ခဲ့ကြောင်းသိရသည်ဟု ပါရှိသည်။