လွိုင်ကော်မြို့နယ် ကုန်းဆွတ်နှင့် ကျောက်ကြီး ကျေးရွာကြားတွင် ယနေ့မနက်က ကရင်နီ လက်နက်ကိုင်ပူးပေါင်းတပ်ဖွဲ့နှင့် အကြမ်းဖက်စစ်ကောင်စီတပ်တို့ တိုက်ပွဲဖြစ်ပွား၍ စစ်ကောင်စီတပ်ဘက်က ၇ဦး သေဆုံးပြီး ၁၀ဦးထက်မနည်း ထိခိုက်ဒဏ်ရာရရှိခဲ့ကြောင်း ကရင်နီအမျိုးသားကာကွယ်ရေးတပ်ဖွဲ့(KNDF)က သတင်းထုတ်ပြန်သည်။
အဆိုပါဒေသသို့ စစ်ကြောင်းထိုးလာသည့် စစ်ကောင်စီတပ်များကို KNDFနှင့် ကရင်နီပြည်တပ်မတော်(KA)တို့ ပးပေါင်း ခုခံတိုက်ခိုက်ခဲ့၍ နာရီဝက်ကြာ တိုက်ပွဲဖြစ်ခဲ့သည်ဟု ဆိုသည်။
ယခုရက်ပိုင်းတွင် စစ်ကောင်စီတပ်များသည် လွိုင်ကော်မြို့နယ် အရှေ့ဘက်ခြမ်းရှိ ကျေးရွာများဘက်သို့ စစ်ကြောင်း ၃ကြောင်းဖြင့် စစ်ကြောင်းထိုးလျက်ရှိကြောင်း၊ ဩဂုတ် ၂၃ရက်က ကယန်းသာယာ ကျေးရွာသို့ အကြမ်းဖက်စစ်ကောင်စီတပ်က ဝင်ရောက်ပြီး နေအိမ်များကို ဖောက်ထွင်းခြင်း၊ ကျေးရွာအနီး တောင်ယာထဲ၌ ပုန်းအောင်းနေသည့် ပြည်သူများကို အကြမ်းဖက်ရိုက်နှက်ခြင်းများ လုပ်ဆောင်ခဲ့ကြောင်း KNDFက ထုတ်ပြန်သည်။
စစ်ကောင်စီတပ်၏ ထိုးစစ်ကြောင့် ကယားပြည်နယ် ဘောလခဲ၊ ဒီးမောဆို၊ ဖရူဆိုနှင့် ရှမ်းပြည်နယ် ဖယ်ခုံမြို့နယ်များတွင် ကရင်နီလက်နက်ကိုင်တပ်များနှင့် ဒေသခံ ပြည်သူ့ကာကွယ်ရေးတပ်များ ပူးပေါင်းပြီး စစ်ကောင်စီကို ခုခံတိုက်ခိုက်ခဲ့ရာ တိုက်ပွဲများ မကြာခဏ ဖြစ်ပွားနေသည်။
Public Service Announcement
