—People’s Spring
ပြည်သူလူထုနှင့် ရပ်တည်မှုမရှိဘဲ အကြမ်းဖက်စစ်ကောင်စီအလိုကျ တာဝန်ထမ်းဆောင်နေသည့် CDM ဆောင် ရွက်ခြင်းမရှိသော ရဲဝန်ထမ်းများနှင့် ၎င်းတို့၏ မိသားစုဝင်များ အသက်၊ အိုးအိမ်၊စည်းစိမ်တို့အား လုံး၀တာဝန်ယူမည် မဟုတ်ကြောင်း ဗိဿနိုးနယ်မြေပြည်သူ့ကာကွယ်ရေးတပ်ဖွဲ့(PDF)က သတိပေးချက် ထုတ်ပြန်ခဲ့သည်။
ယနေ့ စက်တင်ဘာ ၅ရက် နံနက်က မကွေးတိုင်းဒေသကြီး မြို့သစ်မြို့နယ် ရွှေလရောင် ကွက်သစ်ရပ်ကွက်ရှိ ရဲစခန်း ရဲဝန်ထမ်းအိမ်ယာအား ဗုံးဖြင့် တိုက်ခိုက်ခဲ့ကြောင်း ထုတ်ပြန်ရာ၌ အထက်ပါအတိုင်း သတိပေး ချက် ဖော်ပြခဲ့ခြင်းဖြစ်သည်။
CDM မလုပ်သေးသည့် ရဲဝန်ထမ်းများအနေဖြင့် ပြည်သူနှင့်အတူ တစ်သားတည်း အမြန်ဆုံးရပ်တည်သွားရန် သတိပေးကြောင်းလည်း ထုတ်ပြန်ချက်၌ ဖော်ပြထားသည်။
ဗိဿနိုးနယ်မြေ PDF အနေဖြင့် ပြည်သူ့ကာကွယ်ရေးတပ်ဖွဲ့များနှင့် ပူးပေါင်းကာ စစ်အာဏာရှင်စနစ် အမြစ်ပြတ်သည်အထိ တိုက်ခိုက်သွားမည်ဖြစ်ကြောင်း ထုတ်ပြန်ခဲ့ပြီး ပြည်သူလူထုများ အနေဖြင့် ပူးပေါင်းပါဝင်ကြရန် မေတ္တာရပ်ခံထားသည်။
ဗိဿနိုးနယ်မြေ PDFသည် ယခင်ကလည်း စစ်ကောင်စီခန့် အုပ်ချုပ်ရေးမှူးအချို့အပါအဝင် စစ်ကောင်စီသတင်းပေးများကို တိုက်ခိုက်ခဲ့ပြီး မကွေးလေတပ်စခန်းအတွင်း၌လည်း ဗုံးခွဲတိုက်ခိုက်မှု လုပ်ဆောင်ခဲ့ကြောင်း ထုတ်ပြန်ထားသည့် အဖွဲ့ဖြစ်သည်။