ရောင်ရဲတင်းတိမ်တဲ့စိတ်နဲ့ ရိုးသားကြိုးစားဖို့၊ ဝင်ငွေ၊ ထွက်ငွေမျှတအောင်နေထိုင်ဖို့ အရာရှိ၊ စစ်သည်မိသားစု တွေကို အကြမ်းဖက်စစ်ခေါင်းဆောင်မင်းအောင်လှိုင်က မနေ့ကပြောကြားခဲ့ပါတယ်။
အကြမ်းဖက်စစ်ခေါင်းဆောင်မင်းအောင်လှိုင်ဟာ ပြင်ဦးလွင်တပ်နယ်ရှိ စစ်သည်၊ မိသားစုဝင်တွေကို တွေ့ဆုံခဲ့ရာ မှာ ပြောကြားခဲ့တာဖြစ်ပါတယ်။
ခေတ်အဆက်ဆက် စစ်တပ်ထိပ်ပိုင်းခေါင်းဆောင်တွေနဲ့ သူတို့ရဲ့မိသားစုတွေဟာ လုပ်ပိုင်ခွင့်အများအပြားနဲ့ ကျိ ကျိတက်ချမ်းသာနေကြပြီး အရာရှိ၊ စစ်သည်တွေကိုတော့ ရောင်ရဲတင်းတိမ်ဖို့၊ ဝင်ငွေ၊ ထွက်ငွေမျှတအောင်သုံးစွဲ ဖို့ ပြောဆိုနေတာလည်းဖြစ်ပါတယ်။
တပ်မတော်ရဲ့ အဓိကတာဝန်ဟာ နိုင်ငံတော်ကာကွယ် ရေးတာဝန်ဖြစ်ပြီး လိုအပ်ချက်အရ နိုင်ငံတော်တာဝန် တွေကို ခေတ္တတာဝန်ယူထမ်းဆောင်နေတာလို့ မင်းအောင်လှိုင်က ဝါဒဖြန့်ပါတယ်။
မြန်မာပြည်သူလူထုနဲ့ နိုင်ငံတကာအသိုင်းအ၀ိုင်းကတော့ ဖေဖော်ဝါရီ ၁ ရက်ကစပြီး အကြမ်းဖက်စစ်တပ်က အာဏာသိမ်းတယ်လို့ သတ်မှတ်ကြပြီး အာဏာသိမ်းမှုကို လက်မခံကြောင်းနဲ့ ဒီမိုကရေစီနည်းကျ ရွေးကောက်ခံ အရပ်သားအစိုးရထံကို အာဏာပြန်လွှဲဖို့ တောင်းဆိုနေကြပါတယ်။
ဒါ့အပြင် နိုင်ငံတစ်ဝန်း စစ်ကောင်စီကို ပြည်သူတွေရဲ့ခုခံတွန်းလှန်စစ်ကျယ်ပြန့်လာချိန်မှာ ပြည်သူ့ရင်ခွင်ကိုခိုလှုံ လာတဲ့ CDM တပ်မတော်သားတွေနဲ့ ရဲတပ်ဖွဲ့ဝင်တွေ များပြားလာပြီး အဲဒီအချိန်မှာပဲ စစ်ခေါင်းဆောင်မင်းအောင်လှိုင်က စစ်စည်းကမ်းဟာ တပ်မတော်ရဲ့ ကျောရိုးပင်ဖြစ်ကြောင်းနဲ့ စည်းကမ်းသေဝပ်ကာ အမိန့်နာခံမှုကောင်းစွာနဲ့ လုပ်ဆောင်ကြစေလိုတယ်လို့ သိမ်းသွင်းစည်းရုံးခဲ့ပါတယ်။
အာဏာသိမ်းခေါင်းဆောင်က ဗိုလ်လောင်းတွေကိုသာ ရောင့်ရဲတင်းတိမ်ဖို့ပြောပေမယ့် သူနဲ့သူ့မိသားစုက အကြီးအကျယ် လာဘ်စားကြသူတွေပါ။
တပ်ချုပ်ရာထူးမရခင် စီးပွားရေးလုပ်ငန်းသိပ်မရှိသေးပေမယ့် တပ်ချုပ်ဖြစ်လာပြီးနောက်ပိုင်းမှာ အာမခံလုပ်ငန်း ၊ရုပ်ရှင်ထုတ်လုပ်ရေးလုပ်ငန်း ၊ ဖျော်ဖြေရေးလုပ်ငန်းတွေ၊ ဆေးရုံ ၊ စားသောက်ဆိုင်လုပ်ငန်း ၊ Mytel အော်ပရေတာမှာ ရှယ်ယာအများဆုံးပိုင်ဆိုင်ထားသူ စသဖြင့် မြောက်များလှစွာသောစီးပွားရေးများစွာကို ကာလတိုအတွင်း ပိုင်ဆိုင်လာကြပါတယ်။ အကြမ်းဖက်ခေါင်းဆောင်ကိုယ်တိုင်အာဏာသိမ်းပြီး ပထမဆုံးသွားတဲ့ရုရှား ခရီးစဥ်မှာသူပတ်ထားတဲ့ PATEK Philippeနာရီဟာ အမေရိကန် ဒေါ်လာ ၄၃,၄၁၀ တန်ကြေးရှိပါတယ် ။ လက်ရှိဒေါ်လာပေါက်ဈေး ၁ ဒေါ်လာ ၂,၀၀၀ ကျပ်နဲ့ တွက်မယ်ဆိုရင် နာရီတန်ဖိုးကကျပ်သန်း ၈၆၀ ကျော် ရှိပါတယ်။ သူ့ဇနီးဆိုရင်လည်းကိုင်တဲ့ လက်ကိုင် အိတ်တစ်လုံး ကျပ်သန်း ၅၀ ၊၆၀ တန်တွေ ဖြစ်တဲ့အတွက် လာဘ်စားမှုရဲ့ပြယုဂ်တွေအဖြစ် ပြည်သူတွေကဝေဖန်ကြပါတယ်။
ဒါ့အပြင် NLD အမတ် ဦးဘိုဘိုဦးက အကြမ်းဖက်ခေါင်းဆောင်ဟာ အာဏာမသိမ်းခင်မှာ ၂၀၂၀ ရွေးကောက်ပွဲ အနိုင်ရ NLD ခေါင်းဆောင်တွေကို သမ္မတရာထူးသူ့ကိုပေးဖို့တောင်းဆိုခဲ့ပြီး ငြင်းပယ်ခံရပြီးတဲ့နောက်မှာ သူတစ်ယောက်တည်းရဲ့ အာဏာရူးသွပ်မှုကြောင့် အာဏာသိမ်းခဲ့တာလို့ ယခင်အပတ်ကပဲ ပြောထားပါတယ်။