အကြမ်းဖက်စစ်ကောင်စီက ဝန်ထမ်းအဖြစ်ကနေထုတ်ပယ်ပြီး နိုင်ငံတော်သစ္စာဖောက်မှုနဲ့ တရားစွဲခံထားရတဲ့ မြန်မာသံအမတ်ကြီး ဦးကျော်မိုးထွန်းဟာ လက်ရှိရာထူးအတိုင်း လာမယ့် ၂၀၂၂ စက်တင်ဘာအထိ ကုလသမဂ္ဂဌာနချုပ်မှာ ဆက်လက်တာဝန်ထမ်းဆောင်ခွင့်ရရှိမယ်လို့ သတင်းဌာနအချို့ကို ပြောကြားပါတယ်။
အခုနှစ် ကုလသမဂ္ဂအထွေထွေညီလာခံမှာ အကြမ်းဖက်စစ်ကောင်စီရော၊ မြန်မာသံအမတ်ကြီး ဦးကျော်မိုးထွန်း ရော တက်ရောက်မိန့်ခွန်း(General Debate)ပြောကြားခွင့်မရခဲ့ပေမယ့် ဦးကျော်မိုးထွန်းက လက်ရှိအတိုင်း ကုလသမဂ္ဂဌာနချုပ်မှာ မြန်မာနိုင်ငံကိုယ်စားပြုထိုင်ခုံကို ဆက်လက်ရရှိနေမယ်လို့နားလည်ထားကြောင်း BBC နဲ့ VOA သတင်းဌာနတွေနဲ့ ဆက်သွယ်မေးမြန်းမှုအစီအစဉ်မှာ ပြောကြားခဲ့ပါတယ်။
“ဒီ စစ်ကောင်စီကို နိုင်ငံတကာ အသိုင်းအဝိုင်းက လုံးဝ အသိအမှတ်ပြုခြင်း မရှိဘူးပေါ့နော်။ မရှိတဲ့အတွက် ကြောင့်လည်းပေါ့နော်၊ စစ်ကောင်စီရဲ့ ကိုယ်စားလှယ်ကို ဒီလိုမျိုး မျက်နှာစာမှာ လက်ခံဖို့မရှိဘူး ဆိုတာကိုတော့ ကျနော် နိုင်ငံတွေ အတော်များများနဲ့ ပြောဆိုထားချက်အရ ဒါတွေကို သိထားရပါတယ်။ ဒါကြောင့်မို့လို့ပေါ့နော် စစ်ကောင်စီ ကိုယ်စားလှယ်ကတော့ ဘယ်လိုအနေအထားနဲ့ပဲ ဖြစ်ဖြစ် ဒီမှာ ကိုယ်စားပြုခွင့်ရဖို့ မရှိဘူးဆိုတာ မျိုးတော့ ကျနော် ပြောလို့ရပါတယ်” လို့ သံအမတ်ကြီးဦးကျော်မိုးထွန်းက VOA သတင်းဌာနကို ပြောပါတယ်။
အကြမ်းဖက်စစ်တပ်က အာဏာသိမ်းပြီးနောက်ပိုင်း သံအမတ်ကြီးဦးကျော်မိုးထွန်းဟာ ကုလသမဂ္ဂဌာနချုပ် ညီလာခံတစ်ခုမှာ မြန်မာနိုင်ငံမှာ စစ်တပ်က အာဏာ သိမ်းတာကို ကန့်ကွက်ရှုတ်ချကြောင်း ရဲဝံ့စွာထုတ်ဖော် ပြောကြားခဲ့ပြီး မြန်မာပြည်သူတွေနဲ့ တစ်သားတည်းရပ်တည်ကြောင်း ပြသခဲ့ပါတယ်။
Public Service Announcement
လက်ရှိမှာ သံအမတ်ကြီးဟာ ဦးကျော်မိုးထွန်းဟာ ရွေးကောက်ခံလွှတ်တော်ကိုယ်စားအများစုနဲ့ စုဖွဲ့ထားတဲ့ အမျိုးသားညီညွတ်ရေးအစိုးရ NUG ကို ထောက်ခံထားပါတယ်။
တစ်ဖက်မှာလည်း NUG နဲ့အပြိုင် အကြမ်းဖက်စစ်ကောင်စီက ကုလသမဂ္ဂမှာ ကိုယ်စားပြုခွင့်ရရှိရေးအတွက် စစ်သံမှူး အောင်သူရိန်ကို အမည်စာရင်းတင်သွင်းထားတာကြောင့် ကုလသမဂ္ဂရဲ့ အရည်အချင်းစစ်ကော်မတီ (Credentials Committee)က ဘယ်သူ့ကို ကိုယ်စားပြုခွင့်ပေးမလဲဆိုတာ ဆွေးနွေးဆုံးဖြတ်ဖို့ ရှိနေပါတယ်။
Credentials Committee ရဲ့ ဆုံးဖြတ်ချက် မချခင်အထိ လက်ရှိတာဝန်ထမ်းဆောင်ဆဲ သံအမတ်ကြီးဦးကျော်မိုး ထွန်းက မြန်မာနိုင်ငံကိုယ်စားပြုထိုင်ခုံမှာ ဆက်လက်ရှိနေမှာဖြစ်ပါတယ်။
