'/%3E%3C/svg%3E){kind=small}
ကေအဲန်ယူ ထိန်းချုပ်နယ်မြေထဲ ကျူးကျော်ဝင်ရောက်လာတဲ့ အကြမ်းဖက်စစ်ကောင်စီတပ်နဲ့ ကရင်အမျိုးသားလွတ်မြောက်ရေးတပ်မတော် (KNLA)တို့ကြား ဒီကနေ့မနက်ပိုင်းက တိုက်ပွဲဖြစ်ပွားခဲ့တယ်လို့ သတင်းရရှိပါတယ်။
ကရင်ပြည်နယ် ကော့ကရိတ်မြို့နယ် အာရှလမ်းမအနီးက ဒေါနတောင်ခြေတစ်နေရာမှာ ဖြစ်ပွားခဲ့တာပါ။
ဒီကနေ့ မနက် ၇ နာရီခွဲအချိန်က ကော့ကရိတ် မြဝတီ အာရှလမ်းမအနီးမှာရှိတဲ့ ကေအဲန်ယူရဲ့မွေးမြူရေးဇုန်နဲ့ ရေလုပ်ငန်းဇုံအတွင်းမှာ အကြမ်းဖက်စစ်ကောင်စီတပ်က နယ်မြေကျော်ပြီး ရောက်ရှိလာခဲ့တာပါ။
ဒီလို နယ်မြေကျော်လာတဲ့ အကြမ်းဖက်စစ်ကောင်စီတပ်နဲ့ KNLA တပ်တို့ကြား တိုက်ပွဲဖြစ်ပွားခဲ့ရာ စစ်ကောင်စီဘက်က ၃ ဦးသေဆုံးခဲ့တယ်လို့ နယ်မြေခံ KNLA အရာရှိတစ်ဦးက ပြောပါတယ်။
Public Service Announcement
” မနေ့က အာရှလမ်းမရဲ့ ကိုက် ၃၀၀ အကွာမှာရှိတဲ့ ကေအဲန်ယူထိန်းချုပ်နယ်မြေမှာ သူတို့လှုပ်ရှားမှုရှိတယ်။ ဒီမနက်မှာ ထိပ်တိုက်တွေ့ဆုံပြီးတော့ ထိတွေ့မှုဖြစ်တာ သူတို့ဘက်က ၃ ယောက်သေတယ်” နယ်မြေခံ KNLA အရာရှိတစ်ဦးက ဆိုပါတယ်။
သေဆုံးသွားခဲ့တဲ့ အကြမ်းဖက်စစ်ကောင်စီတပ်ဟာ ခမရ ၅၅၆ တပ်ဖြစ်ပြီး အခုအချိန်မှာတော့ အဲ့ဒီနေရာဝန်းကျင်တစ်ဝိုက်မှာ စစ်ကောင်စီတပ်က လုံခြုံရေးတိုးမြင့်ထားတယ်လို့ သိရပါတယ်။
