ကရင်အမျိုးသားအစည်းအရုံး(KNU/KNLA) တပ်မဟာ (၁)နယ်မြေတွင် ယမန်နေ့(အောက်တိုဘာ၂၄) တစ်ရက်အတွင်း နေရာငါးခု၌ တိုက်ပွဲဖြစ်၍ စစ်ကောင်စီတပ်မှ ၁၄ဦးသေ၊ ကိုးဦးဒဏ်ရာရရှိခဲ့ကြောင်း KNU ဗဟို သတင်းနှင့် ပြန်ကြားရေးဌာနက သတင်းထုတ်ပြန်သည်။
KNU ဘီးလင်းမြို့နယ် ဝင်းတာပန်ကျေးရွာတွင် စခန်း ချထားသော စစ်ကောင်စီနှင့် ကရင်နယ်ခြားစောင့်တပ်(BGF)ပူးပေါင်းစခန်းမှ တပ်ချိန်းပြီးပြန်လာသော တပ်ဖွဲ့ကို KNU တပ်ဖွဲ့ဝင်များက ကြားဖြတ်တိုက်ခိုက်ခဲ့ခြင်ဖြစ်ကြောင်း ဖော်ပြထားသည်။
စစ်ကောင်စီတပ်မှ သေဆုံးမှုမှာ ခန့်မှန်းခြေဖြစ်ပြီး ယခုထက်ပိုများနိုင်ကြောင်း နှင့် KNUတပ်ဖွဲ့ဝင်များဘက်က ထိခိုက်မှုမရှိကြောင်း ရှေ့တန်းစစ်မြေပြင်မှ တပ်မှးတစ်ဦး၏ ပြောကြားချက်ကိုလည်း ဖော်ပြခဲ့သည်။
အောက်တိုဘာ ၂၄ရက် နံနက် ၅နာရီခန့်က ထီးညာလူကျေးရွာနှင့် ဝမ်းဘဲအင်း ကျေးရွာကြား၌လည်းကောင်း၊ အင်တောကျေးရွာနှင့် ဝမ်းဘဲအင်းကျေးရွာကြား၌ လည်းကောင်း၊ နံနက် ၇ နာရီ ၃၀ ခွဲတွင် ဆောဘိနားကျေးရွာအနီး၌လည်းကောင်း၊ နံနက် ၁၀နာရီခန့်တွင် ထုံးဘို လေးကျေးရွာနှင့် ဝီယော် ကျေးရွာကြား၌ လည်းကောင်း၊ နံနက် ၉ နာရီခန့်တွင် ထုံးဘိုကြီးကျေးရွာနှင့် ထုံးဘိုလေး ကျေးရွာအကြား၌လည်းကောင်း တိုက်ပွဲများဖြစ်ပွားခဲ့သည်ဟု ဆိုသည်။
Public Service Announcement
ထိုသို့ တိုက်ပွဲများဖြစ်ပွားပြီးနောက် ယမန်နေ့ ညပိုင်းတွင် ထုံးဘိုလေးကျေးရွာ ဘုန်းတော်ကြီးကျောင်း အတွင်းစခန်းချ တပ်စွဲ့ထားသော တပ်ခွဲမူးကျော်ဇင်လှဦးဆောင်သည့် တပ်မ (၂၂)၊ ခမရ (၂၀၁)တပ်ရင်းမှ လက်နက် ကြီးဖြင့် ရမ်းသမ်းပစ်ခတ်ခဲ့ရာ ထုံးဘိုကြီးကျေးရွာရွာလယ်ရှိ နေအိမ်တစ်ခု၏ ဘေး၌ ကျရောက်ပေါက်ကွဲခဲ့၍ ထိခိုက်ပျက်စီးမှုရှိခဲ့ကြောင်း ဖော်ပြထားသည်။
KNU သထုံခရိုင် တပ်မဟာ(၁)နယ်မြေအတွင်း အာဏာ သိမ်းစစ်ကောင်စီတပ်များက စစ်ရေးလုပ်ရှား မှုနှင့် လူ့အခွင့်ရေးချိုးဖေါက်မှုများ ပြုလုပ်နေ၍ KNU လက်အောက်ခံ ကရင်အမျိုးသား ကာကွယ်ရေးတပ်မတော်(KNLA) တပ်ဖွဲ့ဝင်များနှင့် တိုက်ပွဲများ ဆက်တိုက်ဖြစ်ပွားနေကြောင်း၊ ပြီးခဲ့သည့် ရက်ပေါင်း ၂၀အတွင်း တိုက်ပွဲပေါင်း ၃၀ကျော် ဖြစ်ပွားခဲ့ကြောင်း ထုတ်ပြန်ထားသည်။
