စစ်ကောင်စီကို အသိအမှတ်မပြုရေး G-20 အစည်းအဝေးအကြိုမှာ မြန်မာသံအမတ်ကြီး တိုက်တွန်း

တရားမဝင်အကြမ်းဖက်စစ်ကောင်စီကို အသိအမှတ်မပြုရေး နိုင်ငံတကာက ဆက်လက်ဆောင်ရွက်ဖို့ ကုလသမဂ္ဂဆိုင်ရာ မြန်မာသံအမတ်ကြီး ဦးကျော်မိုးထွန်းက အောက်တိုဘာ၂၇ရက်မှာပြုလုပ်တဲ့ G-20 အစည်းအဝေးအကြိုမှာ တိုက်တွန်းပြောကြားပါတယ်။

အီတလီ၊ ရောမမြို့မှာ ကျင်းပမယ့် G-20 အစည်းအဝေးနဲ့ဆက်စပ်ပြီး “Averting Catastrophe in Myanmar: COVID 19, Economic Collapse and an Effective International Response” ခေါင်းစဉ်နဲ့ မြန်မာ့အရေးဆွေးနွေးပွဲကျင်းပရာမှာ မြန်မာသံအမတ်ကြီးက တိုက်တွန်းခဲ့တာပါ။

အမျိုးသားညီညွတ်ရေးအစိုးရ(NUG)၏ ကိုယ်စားလှယ်တွေဆီကနေ မြန်မာပြည်သူလူထုရဲ့ အသံကိုကျယ်လောင်စွာ ကြားသိနိုင်ရေးအတွက် နိုင်ငံတကာအသိုင်းအဝန်းက လုပ်ဆောင်သင့်ပြီး NUG ကို တရားဝင်အစိုးရအဖြစ် အသိအမှတ်ပြုကြောင်း မကြာမီကြေညာနိုင်မယ်လို့ မျှော်လင့်မိတယ်လို့လည်း သံအမတ်ကြီး ဦးကျော်မိုးထွန်းက ပြောပါတယ်။

စစ်ကောင်စီကို ကုလသမဂ္ဂနဲ့ အာဆီယံ အစည်းအဝေးတွေမှာ ဆက်လက်ဖယ်ချန်ထားဖို့ဖြစ်ပြီး လက်ရှိကျင်းပနေတဲ့ အာဆီယံအစည်းအဝေးတွေမှာ စစ်ကောင်စီရဲ့ ကိုယ်စားလှယ်ကို တက် ရောက်ခွင့်မပြုခဲ့ခြင်းနဲ့ UN-ASEAN အစည်းအဝေး ရွှေ့ဆိုင်းခဲ့ခြင်းဟာ စစ်ကောင်စီကို ဖိအားပေးရာမှာ ထိရောက်တဲ့ သာဓကတွေဖြစ်တယ်လို့ သံအမတ်ကြီးက ပြောပါတယ်။

Public Service Announcement

နောက်ပြီး စစ်တပ်အကျိုးစီးပွားအတွက် အထောက် အကူပြုတဲ့ငွေကြေးစီးဆင်းမှုတွေကို ချက်ချင်းရပ်တန့်ဖို့လိုအပ်ပြီး ပိုမိုထိရောက်တဲ့ အရေးယူဆောင်ရွက်မှုမျိုးကို ကုလသမဂ္ဂလုံခြုံရေးကောင်စီက ချမှတ်သင့်တယ်လို့ သံအမတ်ကြီးက တိုက်တွန်းပါတယ်။

ဒါ့အပြင် လူသားချင်းစာနာထောက်ထားမှု အကူအညီလိုအပ်နေတဲ့ ပြည်သူတွေထံ နယ်စပ်ဖြတ်ကျော် အကူအညီပေးခြင်းအပါအဝင် အခြား လူသားချင်းစာနာထောက်ထားမှု အကူအညီတွေကို အမြန်ဆုံးထောက်ပံ့ပေးနိုင်ဖို့ အာဆီယံနဲ့ နိုင်ငံတကာအသိုင်းအဝန်းကို တိုက်တွန်းခဲ့ပါတယ်။

အထက်ပါအစည်းအဝေးကို NUG၏ ပြည်ထောင်စုဝန်ကြီးတွေဖြစ်တဲ့ ဒေါက်တာဇော်ဝေစိုး၊ ဒေါက်တာဝင်းမြတ်အေး၊ Mae Tao ဆေးခန်းတည်ထောင်သူ ဒေါက်တာစင်သီယာမောင်၊ ကျန်းမာ ရေးဝန်ထမ်း ဒေါက်တာနေလင်းထွန်းတို့လည်း တက်ရောက်ခဲ့ပါတယ်။