စစ်ကိုင်းတိုင်း မင်းကင်းမြို့နယ် လောင်းပြည့်ကျေးရွာ၌ အကြမ်းဖက်စစ်ကောင်စီတပ်နှင့် ၎င်းလက်အောက်ခံ ပျူစောထီ ပူးပေါင်းစစ်ကြောင်း ပဒေသာမိုင်းထိကာ ၁၀ ဦး သေဆုံးပြီး သုံးဦးအပြင်းအထန် ဒဏ်ရာရရှိသည်ဟု မင်းကင်းပြည်သူ့ကာကွယ်ရေးတပ်ဖွဲ့က ယနေ့ (နိုဝင်ဘာ၁)ထုတ်ပြန်သည်။
အင်အား ၈၀ခန့်ရှိသော စစ်ကောင်စီတပ်သားနှင့် ပျူစောထီများမှာ ဇင်ကလဲ နှင့် လောင်းပြည့်ကျေးရွာများဘက်သို့ အောက်တိုဘာ ၃၁ ရက်က စစ်ကြောင်းထိုးလာရာမှ မင်းကင်း နှင့် ကနီ ရှိပြည်သူတပ်ဖွဲ့များ ထောင်ထားသည့် ပဒေသာမိုင်းမိသွားခဲ့ခြင်းဖြစ်သည်။
“အနည်းဆုံး ၁၀ ယောက်သေတယ်ဆိုတာ သေချာတယ်။လက်ရှိ အခြေအနေအရ သူတို့ စစ်ကြောင်းမထိုးနိုင်သေးဘူး”ဟု မင်းကင်းပြည်သူ့ကာကွယ်ရေးတပ်ဖွဲ့မှ ဗိုလ်သံလုံးက ပြောသည်။
အဆိုပါ ပဒေသာမိုင်းမိခဲ့သည့် စစ်ကောင်စီစစ်ကြောင်းသည် အောက်တိုဘာ ၂၆ ရက်က မင်းကင်းမြို့နယ်ရှိ သင်တော၊ညောင်ပင်သာ၊အုန္နဲဘုတ်၊ဘင်နှင့် အနောက်တောကျေးရွာကို ဝင်ရောက်စီးနင်းခဲ့သည့် စစ်ကြောင်းဖြစ်သည်ဟု မင်းကင်းပြည်သူ့ကာကွယ်ရေး တပ်က အတည်ပြုသည်။