မင်းကင်းတွင်ကျဆုံးခဲ့သည့် PDFလူငယ် သုံးဦးနာရေး ဒေသခံပြည်သူအများအပြားလိုက်ပါပို့ဆောင်

စစ်ကိုင်းတိုင်း၊ မင်းကင်းမြို့နယ်တွင် အကြမ်းဖက်စစ်ကောင်စီက ပစ်သတ်ခဲ့သည့် PDF တပ်ဖွဲ့ဝင် သုံးဦး၏ နာရေးကို ဒေသခံအများအပြား လိုက်ပါပို့ဆောင်ခဲ့ကြသည်။

ယမန်နေ့(နိုဝင်ဘာ ၁၅) နံနက်အစောပိုင်းကမင်းကင်းမြို့ အနောက်တောကျေးရွာတွင် ဒေသလုံခြုံရေးတာဝန်ဖြင့် ကင်းစောင့်ရန် ထွက်လာသော ပြည်သူ့ကာကွယ်ရေးတပ်ဖွဲ့ (PDF)မှ သုံး ဦးကို စစ်ကောင်စီ တပ်ဖွဲ့ဝင်များကပိတ်ဆို့ဖမ်းဆီးပြီး ပစ်ခတ်သတ်ဖြတ်ခဲ့သည်ဟု ဒေသခံများကပြောသည်။ ယင်းလူငယ်သုံးဦး၏ နာရေးကို ယနေ့(နိုဝင်ဘာ ၁၆)ပြုလုပ်ရာ ဒေသခံပြည်သူအများအပြား လိုက်ပါပို့ဆောင်ခဲ့ပြီး အများစုသည် ငိုကြွေးခဲ့ကြသည်။

PDF လူငယ်သုံးဦးသည် မသေဆုံးမီ နှိပ်စက်ခံထားရသော ဒဏ်ရာများရရှိထားပြီး သေနတ်ဒဏ်ရာလည်း တွေ့ရှိခဲ့သည်ဟု ဒေသခံများကပြောသည်။

မင်းကင်းမြို့နယ် ပြည်သူ့ကာကွယ်ရေး တပ်ဖွဲ့ခေါင်းဆောင်က “အလောင်းတွေကို ပုံထပ်ထားတာခဲ့တာ။ အလောင်းတွေကို ဒီတိုင်း ဆိုင်ကယ်နဲ့ ဆွဲတာလား၊ လူနဲ့ပဲ ဆွဲတာလားတော့ မသိဘူး။ ဒါပေမဲ့ ဆွဲထားတဲ့ အရာတွေ ရှိတယ်။ နောက်သေပြီးမှ ရိုက်နှက်တာတွေ ထပ်လုပ်ထားတယ် ထင်တယ်။ တော်တော်လေးကို ရုပ်ပျက်ဆင်းပျက်ဖြစ်နေတာ။ ကြည့်လို့ အဆင်မပြေဘူး” ဟု ဧရာဝတီသတင်းဌာနအား ဖြေကြားထား ပြောသည်။

Public Service Announcement