ကေအဲန်ယူ ထိန်းချုပ်နယ်မြေဖြစ်တဲ့ ဖာပွန်ခရိုင် မဲဝိုင်ဒေသမှာအခြေစိုက်တဲ့ စစ်ကောင်စီတပ်စခန်းကို KNLA တပ်မဟာ ၅ က ဝင်ရောက်တိုက်ခိုက်သိမ်းပိုက်တယ်ဆိုတဲ့သတင်းဟာ သတင်းအမှားသာဖြစ်ပြီး မဟုတ်မှန်ဘူးလို့ တပ်မဟာ ၅ ပြောရေးဆိုခွင့်ရှိသူထံကပြောပါတယ်။
နိုဝင်ဘာ ၂၂ ရက်က ကေအဲန်ယူထိန်းချုပ်နယ်မြေဖြစ်တဲ့ ဖာပွန်ခရိုင်မှာ စစ်ကောင်စီရဲ့မဲဝိုင်တပ်စခန်းကို KNLA တပ်မဟာ ၅ က ဝင်ရောက်တိုက်ခိုက်သိမ်းယူခဲ့ပြီး နှစ်ဖက်ကျဆုံးမှုတွေများပြားခဲ့တယ်ဆိုပြီး အွန်လိုင်းစာမျက်နှာပေါ်မှာ သတင်းအမှားတွေ ထွက်ပေါ်လာခဲ့တာပါ။
ဒီလို စခန်းသိမ်းတိုက်ပွဲသတင်းအမှားတွေနဲ့ပတ်သက်ပြီး KNLA တပ်မဟာ ၅ ပြောရေးဆိုခွင့်ရှိသူဖြစ်တဲ့ ဒု-ဗိုလ်မှူးကြီးစောကလယ်ဒိုကတော့ ဒီလိုအခုလိုပဲ ရှင်းပြပြောဆိုသွားခဲ့ပါတယ်။
“သတင်းအမှားနဲ့ပတ်သက်ပြီးတော့ ခဏခဏတက်လာတယ်အဲ့လိုမျိုး။ ဘယ်အဖွဲ့ကနေ ဘယ်ကလဲမပြောတတ်ဘူး။ မမှန်ကန်တဲ့သတင်းကို အဲ့လိုမျိုးပေးတာကတော့ ဒါက အဖျက်သဘောမျိုးနဲ့လုပ်တာလားတော့ မပြောတတ်ဘူးပေ့ါနော်။ ဒီမှာတော့ ဘာမှ သတင်းဘာမှကိုမရဘူးနော်” လို့ ဒု-ဗိုလ်မှူးကြီးစောကလယ်ဒိုက ပြောပါတယ်။
Public Service Announcement
ကေအဲန်ယူ ဖာပွန်ခရိုင် တပ်မဟာ ၅ နယ်မြေအတွင်းမှာ စစ်ကောင်စီတပ်နဲ့ KNLA တပ်မဟာ ၅ တို့ကြား တိုက်ပွဲတွေဟာ နေ့စဉ်လိုလိုဖြစ်ပွားနေပြီး တိုက်ပွဲဖြစ်စဉ်သတင်းနဲ့ပတ်သက်ပြီး ကေအဲန်ယူ မူတြော်သတင်းစဉ်မှာ တရားဝင်ထုတ်ပြန်ထားရှိတာ ဖြစ်ပါတယ်။
