ဖမ်းဆီးခံအမျိုးသမီးသတင်းထောက်များအပါအဝင် မီဒီယာလွတ်လပ်ခွင့်အတွက် ဗြိတိန်အစိုးရဆက်လက်ရပ်တည်မည်

အကြမ်းဖက်စစ်​ကောင်စီ၏ ဖမ်းဆီးခံထားရသော အမျိုးသမီးသတင်းထောက်များအပါအဝင် မီဒီယာလွတ်လပ်ခွင့်အတွက် UK အစိုးရက ဆက်လက်ရပ်တည်သွားမည်ဖြစ်ကြောင်း ရန်ကုန်မြို့ရှိဗြိတိန်သံရုံးက ယနေ့ (နိုဝင်ဘာ ၂၈)ထုတ်ပြန်သည်။

“သတင်းမီဒီယာလွတ်လပ်ခွင့်နှင့် အမျိုးသမီးလွတ်လပ်ခွင့်များသည် ဒီမိုကရေစီစနစ် အတွက် မရှိမဖြစ်အရေးပါ နေပြီး၊ အမျိုးသမီးသတင်းထောက်များနှင့် အခြားမီဒီယာသမားများ၏ လွတ်လပ်ခွင့်အတွက် ယူကေအစိုးရက ဆက်လက်ပံ့ပိုးရပ်တည်သွားမည်ဖြစ်သည်”ဟု ထုတ်ပြန်ချက်တွင် ဖော်ပြသည်။

မြန်မာနိုင်ငံတွင် စစ်အာဏာသိမ်းပြီးချိန်မှစပြီး အမျိုးသမီးသတင်းထောက် အနည်းဆုံး ၁၉ ဦးတို့သည် ၎င်းတို့၏ အလုပ်ကို ရိုးရှင်းစွာ ထမ်းဆောင်ရုံမျှဖြင့် ဖမ်းဆီးခံခဲ့ရသည်ဟု သံရုံးထုတ်ပြန်ချက်က ဆိုသည်။

ထို့အပြင် သတင်းထောက်များသည် အမှန်တရားကို ထုတ်ဖော်ရေးသားရုံမျှဖြင့် မတရားဖမ်းဆီးချုပ်နှောင်မှုများ၊ ညှဉ်းပန်းနှိပ်စက်မှုများနှင့် တရားစွဲဆိုခံရနိုင်သည့် အန္တရာယ်များကြုံတွေ့နေရပြီး အထူးသဖြင့် အမျိုးသမီးသတင်းထောက်များသည် လိင်ပိုင်းဆိုင်ရာ နှောင့်ယှက်၊ စော်ကားခံရမှုများနှင့် ခြိမ်းခြောက်မှုများကို တိုးမြှင့်ရင်ဆိုင်နေရကြောင်း ထောက်ပြထားသည်။

Public Service Announcement

လက်ရှိတွင် မြန်မာအမျိုးသမီး သတင်းထောက် အနည်းဆုံး ၈ ဦး ဆက်လက်ထိန်းသိမ်းခံနေရဆဲ ဖြစ်သည်ဟု ဗြိတိန် သံရုံးထုတ်ပြန်ချက်တွင် ဖော်ပြထားသည်။