ကရင်အမျိုသားအစည်းအရုံး(KNU) တပ်မဟာ(၆) နယ်မြေ ဒူးပလာယာခရိုင်တွင် KNU လက်အောက်ခံ ကရင်အမျိုးသားလွတ်မြောက်ရေးတပ်မတော်(KNLA) နှင့် စစ်ကောင်စီတပ်တို့ ယနေ့ တိုက်ပွဲပြန်ဖြစ်၍ စစ်ကောင်စီတပ်မှ သုံးဦးသေဆုံးခဲ့သည်။
ယနေ့ နံနက် (၉)နာရီကျော်အချိန်ခန့်တွင် KNLA တပ်ရင်း(၁၆)လက်အောက်ခံ တပ်ခွဲ (၄)နှင့် အာဏာ သိမ်းစစ်ကောင်စီတပ် ခလရ- ၁၀၆ တပ်ရင်းတို့ ဒူးပလာယာခရိုင် ဝင်းရေးမြို့နယ် တောင်နောက်ခြမ်းဘေး လမိုင်းကျေးရွာတွင် ထိပ်တိုက်တိုက်ပွဲဖြစ်ပွားခဲ့သည်ဟု ဒူးပလာယာခရိုင်က ထုတ်ပြန်သည်။
အဆိုပါတိုက်ပွဲတွင် အာဏာသိမ်းစစ်ကောင်စီတပ်မှ သုံးဦးသေဆုံးသွားကြောင်းနှင့် KNLA ဘက် ထိခိုက်မှုမရှိကြောင်းဖော်ပြထားသည်။
ဒီဇင်ဘာ၅ရက်တွင် အာဏာသိမ်းစစ်ကောင်စီတပ် ခလရ- ၁၀၆ တပ်ရင်းမှ ဝါပေါ်ကျေးရွာနေ ဆင်ထိန်းသမားတစ်ဦးကို PDF ဟု စွပ်စွဲကာ အတင်းအဓမ္မဖမ်းဆီးခေါ်ဆောင်သွားကြောင်း ထုတ်ပြန်ချက်၌ ပါရှိသည်။
Public Service Announcement
စစ်တပ်အာဏာသိမ်းပြီးနောက်ပိုင်း စစ်ကောင်စီတပ်နှင့်တိုက်ပွဲဖြစ်ပွားမှုအချို့ရှိခဲ့သည့်KNUတပ်မဟာ(၆) နယ်မြေတွင် နိုဝင်ဘာအတွင်းက တိုက်ပွဲဖြစ်ပွားမှု မရှိခဲ့ဘဲ ယခု ဒီဇင်ဘာတွင် တိုက်ပွဲပြန်လည်ဖြစ်ပွားခြင်းဖြစ်သည်။
