ကရင်အမျိုးသားအစည်းအရုံး(KNU) တပ်မဟာ(၅) နယ်မြေတွင် ဒီဇင်ဘာ ၁၉ရက်က တိုက်ပွဲခြောက်ကြိမ်ဖြစ်ခဲ့ပြီး စစ်ကောင်စီတပ်မှ ၁၂ဦးသေ၊ လေးဦးဒဏ်ရာရရှိခဲ့ကြောင်း တပ်မဟာ(၅)က ယနေ့ သတင်းထုတ်ပြန် သည်။
တပ်မဟာ(၅) ထိန်းချုပ်နယ်မြေအတွင်း ဝင်ရောက်လှုပ်ရှားလျက်ရှိသော အကြမ်းဖက် စစ်ကောင်စီ လက်အောက်ခံတပ်ကို ဖာပွန်-ကမမောင်းလမ်းပေါ် မော်လော်ကလိုး ဒေသ၊ ခွေးသေနှင့် ၂၁ မိုင်ကြား၊ ဝါ့ကလေ့တူ ဒေသ၊ ထီးဘာ့အဲလော်ဒေသ၊ တမိုလာလူ ဒေသနှင့် မော်လော်ကလိုး ဒေသတို့၌ စုစုပေါင်း ခြောက်ကြိမ်တိုက်ခိုက်ခဲ့သည်ဟု ဖော်ပြထားသည်။
စစ်ကောင်စီတပ်၏ ဒီဇင်ဘာ ၂၀ရက်မှ ယနေ့(ဒီဇင်ဘာ ၂၂ရက်)နံနက်ပိုင်းအထိ စစ်ကောင်စီတပ်၏ စစ်ရေးလှုပ်ရှားမှု အခြေအနေကိုလည်း KNU တပ်မဟာ(၅)က ထုတ်ပြန်သည်။
ဒီဇင်ဘာ ၂၀ရက် ညသန်းခေါင်ယံအချိန်တွင် စစ်ကောင်စီတပ်ယာဉ်တန်း ၃၀သည် ကမမောင်းမှ ဖာပွန်သို့ ဦးတည်ထွက်ခွာသွားကြောင်း ၊ဒီဇင်ဘာ ၂၁ရက်ကလည်း ညသန်းခေါင်ယံ အချိန်တွင် ဖာပွန်ခရိုင်းအတွင်း စစ်ကောင်စီ၏တိုက်လေယာဉ်တစ်စီး လာရောက် ကင်းထောက်လှည့်ပတ်ခဲ့ပြီး နေ့လည်ပိုင်း၌ တစ်စီး လာရောက်ထောက်လှမ်းကြောင်း၊ ဒီဇင်ဘာ ၂၂ရက် နံနက်ပိုင်းတွင်လည်း အကြမ်းဖက်စစ်ကောင်စီတပ်မှ တိုက်လေယာဉ်ဖြင့် နှစ်ကြိမ်လာရောက်ကင်းထောက်ခဲ့ကြောင်း ဖော်ပြသည်။
Public Service Announcement
