ထားဝယ်တက္ကသိုလ်ကျောင်းသားများသမဂ္ဂရဲ့ ခေါင်းဆောင်တစ်ဦးဖြစ်သူ မသီရိမိုးကို ဖမ်းမမိတဲ့အတွက် မိခင်ဖြစ်သူကိုဓားစာခံအဖြစ် ဖမ်းသွားပြီး စစ်ကောင်စီဟာ ထောင်ဒဏ် ၂ နှစ်ချလိုက်တယ်လို့သိရပါတယ်။
မသီရိမိုးရဲ့မိခင်ကို စစ်ကောင်စီတပ်ဖွဲ့ဝင်တွေဟာ နိုဝင်ဘာ ၈ ရက်က နေအိမ်မှာဖမ်းသွားတာဖြစ်ပြီး နိုင်ငံတော်ဆူပူအောင်လှုံဆော်မှု ရာဇသတ်ကြီးပုဒ်မ ၅၀၅ (က) နဲ့တရားစွဲကာ ဒီဇင်ဘာလ ၂၇ ရက်မှာတော့ ထောင်ဒဏ် ၂ နှစ်ချလိုက်တယ်လို့ မသီရိမိုးက သူရဲ့ဖေ့ဘွတ်ခ်ကနေအသိပေးထားပါတယ်။
မသီရိမိုးဟာ ထားဝယ်တက္ကသိုလ် ကျောင်းသားများသမဂ္ဂရဲ့ ဒုတိယ ဥက္ကဋ္ဌ လည်းဖြစ်ပါတယ်။
“ဘာမဟုတ်တဲ့ မိန်းကလေးသေးသေးလေးတစ်ယောက်ကိုတောင်မိအောင်မဖမ်းနိုင်လို့ အမေကိုဖမ်းပြီး လာအဖမ်းခံရင်ပြန်လွှတ်ပေးမယ်ဆိုကတည်းက ဒီကောင်တွေရဲ့သတ္တိကိုစဉ်းစားသာကြည့်ပေတော့” လို့ မသီရိမိုးက ရေးသားထားတာတွေ့ရပါတယ်။
Public Service Announcement
စစ်အာဏာသိမ်းတဲ့အပေါ် ဆန့်ကျင်သူတွေကို စစ်ကောင်စီဟာ ဖမ်းဆီးရာမှာ သူတို့အလိုရှိသူကိုမတွေ့တဲ့အခါ မိသားစုဝင်တွေ ၊ဆွေမျိုးသားချင်းတွေကိုပါ ဖမ်းတာတွေကိုပါလုပ်ခဲ့တာပါ။
ဒါအပြင် နေအိမ်တွေကို ချိတ်ပိတ်တာတွေကိုပါ စစ်ကောင်စီဟာ လုပ်ဆောင်နေတာဖြစ်ပါတယ်။
