စစ်ကိုင်းတိုင်း ဒီပဲယင်းမြို့နယ်အနောက်ခြမ်းတွင် ဒေသကာကွယ်ရေးတပ်ဖွဲ့ဝင်လူငယ်လေးဦး အသတ်ခံခဲ့ရကြောင်း ဒီပဲယင်းညီနောင်များအဖွဲ့နှင့် Voice Of Depeyin တို့က အတည်ပြုသည်။
ဆန့်ကျင်ဘက်အုပ်စုများ၏ လုပ်ကြံသတ်ဖြတ်ခြင်းခံခဲ့ရသော ပြည်သူ့ကာကွယ်ရေးတပ်ဖွဲ့ဝင်လေးဦးမှာ ဂဠုန်တပ်မှဟု ကနဦးသိရသော်လည်း မိခင်အဖွဲ့အစည်းဖြစ်သည့် ဂဠုန်တပ်ဖွဲ့မှ တရားဝင်ထုတ်ပြန်ခြင်း မရှိသေးပေ။
“ဒီပဲယင်းမြို့နယ် အနောက်ခြမ်းဆပ်ပြာကျင်းနဲ့ ထောင်တန်းရွာအကြား မူးဘောင်ရဲ့အရှေ့ဘက်မှာ အသတ်ခံရတာ”ဟု ဒီပဲရင်းယင်းညီနောင်များအဖွဲ့မှ တာဝန်ရှိသူတစ်ဦးက လူထုနွေဦးသို့ ပြောသည်။
အဆိုပါ ရဲဘော်လေးဦးမှာ ယမန်နေ့(ဒီဇင်ဘာ ၂၇)ည ၁၂ နာရီခန့်တွင် အဖွဲ့နှင့် အဆက်အသွယ်ပြတ်ခဲ့ပြီးနောက် မြေပြင်သတင်းပေးပို့သူတစ်ဦးထံမှ ဆက်သွယ်လာချိန်မှ အသတ်ခံထားရသည်ကို သိရှိရကြောင်း ၎င်းက ဆက်ပြောသည်။
Public Service Announcement
လက်ရှိအခြေအနေတွင် ဒီပဲယင်းမြို့နယ်သို့ စစ်ကောင်စီတပ်များရောက်ရှိနေပြီး ကန်ပြားကျေးရွာဘုန်းတော်ကြီးကျောင်းဝင်းအတွင်း အင်အား ၇၀ ကျော်ဖြင့် တပ်စွဲထားကြောင်း သိရသည်။
အထက်ပါ ပြည်သူ့ကာကွယ်ရေးတပ်ဖွဲ့ဝင်လေးဦး လုပ်ကြံသတ်ဖြတ်ခံရမှုမှာ စစ်ကောင်စီ၏လက်ဝေခံ ပျူစောထီးနှင့် ဒလန်များ၏ လက်ချက်ဖြစ်နိုင်ကြောင်း ထင်ကြေးပေးပြောဆိုမှုများလည်း ရှိနေသည်။
