အာဏာရှင်စနစ်ချုပ်ငြိမ်းရေးနှင့် အာဏာရှင်ဟူသမျှ ကျဆုံးသည်အထိ စုပေါင်းအားဖြင့် ၀ိုင်းဝန်းတွန်းလှန်ပြီး ပြည်သူတစ်ရပ်လုံး လိုလားတောင့်တသော ဖက်ဒရယ် ဒီမိုကရေစီနိုင်ငံတော်တည်ဆောက်ရေးအတွက် အခြားတိုင်းရင်းသားလူမျိုးများနှင့်အတူ တော်လှန်တိုက်ပွဲ ဝင်သွားမည်ဖြစ်ကြောင်း တအာင်းနိုင်ငံရေး အတိုင်ပင်ခံကော်မတီ(TPCC)က ယနေ့ အသိပေးထုတ်ပြန်သည်။
ကရင်နီပြည်နယ် ဖရူဆိုမြို့နယ် မိုဆိုကျေးရွာတွင် စစ်ကောင်စီတပ်က ကလေးနှင့် အမျိုးသမီးများ အပါအဝင် အပြစ်မဲ့ပြည်သူ ၃၅ဦးကို အစုလိုက် အပြုံလိုက် ရက်ရက်စက်စက် မီးရှို့သတ်ဖြတ်ခဲ့ သည့်ကျူးလွန်မှုအပေါ် ကန့်ကွက်ရှုတ်ချကြောင်း ထုတ်ပြန်ရာ၌ ယင်းကော်မတီက အထက်ပါအတိုင်း ထည့်သွင်းဖော်ပြခဲ့သည်။
စစ်ကောင်စီ၏ ကျူးလွန်မှုများသည် လူမဆန်သော အကြမ်းဖက်မှုများ ဖြစ်သည့်အပြင် နိုင်ငံတကာ ဥပဒေ ကျင့်ဝတ်များကိုပါ ချိုးဖောက်ပြီး ပြည်သူလူထုတစ်ရပ်လုံးအတွက် ထိတ်လန့်ချောက်ချားဖွယ် ဖြစ်ရပ်များ ဖြစ်သည်ဟု ထုတ်ပြန်ချက်၌ပါရှိသည်။
ဧပြီအတွင်းက ဖွဲ့စည်းခဲ့သည့် TPCCကို တအာင်းနိုင်ငံရေးအင်အားစုများနှင့် စုဖွဲ့ထားကြောင်း၊ အမျိုးသားညီညွတ်ရေးအစိုး၊ ပြည်ထောင်စုလွှတ်တော်ကိုယ်စားပြုကော်မတီနှင့် အမျိုးသားညီညွတ်ရေးအတိုင်ပင်ခံကောင်စီတို့တွင် ပူးပေါင်းဆောင်ရွက်မည်ဖြစ်ကြောင်း ထုတ်ပြန် ထားသည်။ ယင်းကော်မတီတွင် တအာင်းလက်နက်ကိုင်တပ်ဖွဲ့(TNLA) ပါဝင်ခြင်းရှိ၊မရှိ မေးမြန်းရန် TPCCနှင့် TNLA တာဝန်ရှိသူများထံသို့ ဆက်သွယ်ရာ အဆက်အသွယ်မရပေ။
