ကရင်အမျိုးသားအစည်းအရုံး(KNU) တပ်မဟာ(၅)နယ်မြေတွင် စစ်ကောင်စီတပ်ကို ယနေ့ (ဒီဇင်ဘာ၃၁)နံနက်က တိုက်ခိုက်မှု နှစ်ကြိမ် ပြုလုပ်ခဲ့ရာ စစ်ကောင်စီတပ်မှ ထိခိုက်ဒဏ်ရာရသူ ရှိခဲ့ပြီး လက်နက်တစ်လက် သိမ်းဆည်း ရရှိခဲ့ကြောင်း တပ်မဟာ(၅)က ထုတ်ပြန်သည်။
ယနေ့ နံနက် ၇နာရီခန့်က ဖာပွန်မြို့အနီး မြေနီးကုန်းတွင် လှုပ်ရှားနေသည့် စစ်ကောင်စီတပ်အား တိုက်ခိုက်ခဲ့ရာ စစ်ကောင်စီဖက်မှ ထိခိုက်ဒဏ်ရာရမှု ရှိကြောင်း၊ အရေအတွက်ကို မသိရသေးကြောင်း ဖော်ပြသည်။ ထို့ပြင် ဖာပွန် – ကမမောင်း လမ်း ခွေးသေရွာ အခြေစိုက်လှုပ်ရှားလျက်ရှိသည့် စစ်ကောင်စီတပ်ကို နံနက် ၈နာရီ ၄၀ ခန့်တွင် တိုက်ခိုက်ခဲ့ရာ စစ်ကောင်စီလက်အောက်ခံ တပ်ဖွဲ့ဝင်များ၏ AK-47 သေနတ် တစ်လက်သိမ်းဆည်းရမိခဲ့ကြောင်း ဖော်ပြသည်။
KNU တပ်မဟာ(၅)နယ်မြေတွင် တိုက်ပွဲများ နေ့စဉ်လိုလို ဖြစ်ပွားနေပြီး စစ်ကောင်စီတပ်များ အထိနာနေသည်။