ပြည်သူ့ကာကွယ်ရေးတပ်-ဒီးမော့ဆို(DMO-PDF) တပ်ဖွဲ့မှ ကျဆုံးတပ်ဖွဲ့ဝင် ဦးလေးရှို(ခ)ဖာလို၏ ဈာပန အခမ်းအနားကို ယနေ့ ပြုလုပ်ခဲ့ကြောင်း ဒီးမော့ဆို PDF က ထုတ်ပြန်သည်။
အဆိုပါ တပ်ဖွဲ့ဝင်သည် ကယားပြည်နယ် ဒီးမော့ဆိုမြို့ ငွေတောင်ဆည်အနီးတိုက်ပွဲအပြီး နယ်မြေရှင်းလင်းစဥ် အကြမ်းဖက်စစ်ကောင်စီတပ်ဖွဲ့ ထောင်ထားသည့်မိုင်းနင်းမိ၍ ဇန်နဝါရီ ၁ရက်က ထိခိုက်ဒဏ်ရာရရှိခဲ့ပြီး ယနေ့ နံနက်ပိုင်း၌ ကျဆုံးခဲ့ခြင်းဖြစ်သည်ဟု ဆိုသည်။
“ဦးလေးရှို(ခ)ဖာလိုဟာ နွေဦးတော်လှန်ရေးကာလတွင်တာဝန်ကျေပွန်ပြီးလေးစားရတဲ့ ရဲဘော်ကောင်းတစ်ဦးဖြစ်ကြောင်း မှတ်တမ်းတင်အပ်ပါတယ်။ ဒီမိုကရေစီအတွက် အသက်ပေးကာကွယ်သွားခဲ့တဲ့ သူရဲကောင်းရဲဘော် ဦးလေးရှို(ခ)ဖာလိုကိုမိမိတို့အနေနဲ့ ကျန်ရစ်သောမိသားစုနဲ့အတူ ဝမ်းနည်းကြေကွဲရပါတယ်” ဟု ဒီးမော့ဆို PDF၏ ထုတ်ပြန်ချက်၌ ဖော်ပြသည်။
ဒီဇင်ဘာ ၃၁ရက်တွင် ဒီးမော့ဆို ရဲစခန်းနှင့် ငွေတောင်ဆည်အနီး တပ်စွဲထားသည့် စစ်ကောင်စီတပ်ကို ဒီးမော့ဆို PDF အပါအဝင် ဒေသတွင်းရှိ PDFများ၊ ကရင်နီတပ်မတော်(KA)၊ ကရင်နီအမျိုးသားကာကွယ်ရေးတပ်ဖွဲ့(kNDF)၊ KGZ စသည့် ပူးပေါင်းအဖွဲ့က တိုက်ခိုက်ခဲ့၍ တိုက်ပွဲပြင်းထန်ခဲ့ပြီး စစ်ကောင်စီတပ်မျ သေဆုံးထိခိုက်များပြားခဲ့သည်။ အဆိုပါ တိုက်ပွဲများအတွင်း ကရင်နီကာကွယ်ရေးတပ်ဖွဲ့ဝင်အချို့ ကျဆုံးခဲ့ပြီး ဒဏ်ရာရသူများလည်းရှိခဲ့သည်။