ထွေအုပ်ရုံး၌ပြုလုပ်မည့် လွတ်လပ်ရေးနေ့အစီအစဥ် ပွဲပျက်အောင် ဟန့်တားနိုင်ခဲ့ဟု ရေဦး PDF ထုတ်ပြန်

ထွေအုပ်ရုံး၌ ပြုလုပ်မည့် လွတ်လပ်ရေးနေ့အစီအစဥ်အား လုံခြုံရေးတင်းကြပ်သည့်ကြားမှ ပွဲပျက်အောင် ဟန့်တားနိုင်ခဲ့ကြောင်း ရေးဦးမြို့နယ် ပြည်သူ့ကာကွယ်ရေးတပ်ဖွဲ့(PDF-YEU)က ယနေ့(ဇန်နဝါရီ ၄) ထုတ်ပြန်သည်။

ယနေ့နံနက် ၇ နာရီခန့်တွင် ရေဦးမြို့နယ်အထွေထွေအုပ်ချုပ်ရေးရုံးခန်းမတွင် စစ်ကေကာင်စီနှင့် ၎င်း၏ လက်ပါးစေများကျင်းပမည့် လွတ်လပ်ရေးနေ့သဝဏ်လွှာ ဖတ်ကြားမည့်အစီစဉ်ကို အောင်မြင်စွာဖြင့်ဟန့်တား ဖျက်သိမ်းခဲ့ကြောင်း ထုတ်ပြန်ချက်တွင် ဖော်ပြသည်။

လုံခြုံရေးတင်းကြပ်ထားသည့် အထက်ပါထွေအုပ်ရုံးအား ရေဦး PDF နှင့် ရွှေဘိုခရိုင် တပ်ရင်း(၁၁ နှင့် ၁၄) မှ ဗိုလ်ဇွဲဦးစီးသော ပူးပေါင်းအဖွဲ့က LL ဗုံးသီးလေးလုံးဖြင့် ပစ်ခတ်တိုက် ခိုက်ခဲ့သည်ဟု ရေဦး PDF မှ တာဝန်ရှိသူ တစ်ဦးက ပြောသည်။

“စစ်ခွေးတွေရော၊ Non-CDN တွေရော၊ စစ်ခွေးထောက်တိုင်တွေရော သူတို့အားလုံးစုံတဲ့အချိန် လုံခြုံရေး တင်းကြပ်ထားတဲ့ကြားက ကျွန်တော်တို့ PDF တွေ ဘယ်လောက်စွမ်းဆောင်နိုင်တယ်ဆိုတာကို ပြတဲ့အနေနဲ့ ခုလိုပွဲပျက်အောင် ဟန့်တားခဲ့တာပါ”ဟု ၎င်းက ဆိုသည်။

Public Service Announcement

ယနေ့(ဇန်နဝါရီ ၄)ကျရောက်သည့် (၇၄) နှစ်မြောက် လွတ်လပ်ရေးနေ့အခမ်းအနားများကို အာဏာသိမ်း အကြမ်းဖက်စစ်ကောင်စီက မြို့နယ်အချို့တွင် ဦးဆောင်ကျင်းပလျှက်ရှိသည်။

အထက်ပါတိုက်ခိုက်မှုကြောင့် စစ်ကောင်စီဘက်မှ ထိခိုက်သေဆုံးရှိနိုင်သော်လည်း အသေးစိပ်မသိရသေးဘဲ စုံစမ်းနေဆဲဖြစ်သည်။