စစ်ကိုင်းတိုင်း ယင်းမာပင်ခရိုင် ပုလဲမြို့နယ်အတွင်းရှိ ကျေးရွာတစ်ရွာတွင် ဇန်နဝါရီ ၉ ရက်နှင့် ၁၀ ရက်တို့၌ မုံရွာလူထုသပိတ်တိုက်ပွဲဦးဆောင်ကော်မတီအဖွဲ့ဝင် ကိုသန်းကျော်ဦး သွားရောက်ပူးပေါင်းပြီး လူထုထံ နိုင်ငံရေးတရားများ၊ သပိတ်တရားများဟောပြောပွဲ ထပ်မံကျင်းပခဲ့သည်။
ပုလဲမြို့နယ်သည် ယနေ့အချိန်ထိ စစ်ကောင်စီကို ဘက်ပေါင်းစုံ နည်းလမ်းပေါင်းစုံကနေ တော်လှန်တိုက်ခိုက်နေကြဆဲ ဖြစ်သည်။
ပုလဲမြို့နယ်ရှိ လူထုညီညွတ်မှုကြောင့် ယခုကဲ့သို့ စစ်ကောင်စီက အုပ်ချုပ်ခွင့် မရသေးခြင်း ဖြစ်ကြောင်း၊ ထိုသို့ အုပ်ချုပ်ခွင့် မရသည့်အတွက် စစ်ကောင်စီက လူထုကို ရက်ရက်စက်စက် သတ်ဖြတ်ဖိနှိပ်ပြနေခြင်း ဖြစ်ကြောင်း ဟောပြောခဲ့သည်။
” ဒီနေ့ (၁၀/၁/၂၀၂၂) မှာလည်း ပုလဲမြို့နယ်တွင်းကကျေးရွာတချို့ကို စစ်ကောင်စီဟာ ရဟတ်ယာဉ်(၄)စီးသုံးပြီး အပြစ်မဲ့ပြည်သူတွေ၊ ရွာတွေကို ပစ်ခတ်ဖျက်စီးနေပါတယ်။ စစ်ကောင်စီရဲ့ ဒီလိုမျိုးဆိုးဆိုးဝါးဝါး ဖိနှိပ်မှုဒဏ်တွေကို ပြည်သူလူထုဟာ ရင်ဆိုင်ခါးဆီးခံပြီး ဒီနေ့အထိ အစွမ်းကုန် ဘက်ပေါင်းစုံကနေ စစ်ကောင်စီကို တော်လှန်တိုက်ခိုက်နေဆဲဖြစ်တယ်။ ဒီနေ့လိုမျိုး သပိတ်စစ်ကြောင်းတွေ၊ လူထုသပိတ်တွေ ရှိလာခြင်းဟာ လူထုအနေနဲ့ နိုင်ငံရေးကိုကော လက်နက်ကိုင်လမ်းစဉ်ကိုကော ဟန်ချက်ညီညီလာချိတ်ဆက်ပြီး အားကောင်းကောင်းနဲ့ပုံဖော်လာနေတယ်။ ပိုညီညွှတ်လာတယ်ဆိုတာ ပြသနေပါတယ်။ ဒါဟာ အင်မတန်အားရ ဝမ်းသာစရာကောင်းပါတယ် ” ဟု ကိုသန်းကျော်ဦး ဟောပြောခဲ့သည်။
Public Service Announcement
ထို့အပြင် ” ပြည်သူလူထုအနေနဲ့လည်း ဒီထက်ပိုပြီး တော်လှန်ရေးကို ဝင်ရောက်အားဖြည့်ကြပါ။ ပုလဲမြို့နယ်တွင်းမှာရှိတဲ့ ပြည်သူတွေ ဒုက္ခတွင်းကနေ အမြန်ကင်းလွတ်ဖို့ ပုလဲမြို့နယ်တွင်းမှာရှိတဲ့ ပြည်သူတွေကို ကာကွယ်နေတဲ့ PDF တွေကို အားဖြည့်ကူညီပေးကြပါ ” တိုက်တွန်းပြောကြားခဲ့သည်။
ပြီးခဲ့သည့် ဇန်နဝါရီ ၈ ရက် ညပိုင်းကလည်း စစ်ကိုင်းတိုင်း ယင်းမာပင်ခရိုင်အတွင်းရှိ ယင်းမာပင်မြို့နယ်နှင့်ပုလဲမြို့နယ်တွင် စစ်အာဏာရှင် ဆန့်ကျင်ရေး သပိတ်တရား ဟောပြောပွဲ ကျင်းပခဲ့ပြီး ပြည်သူ့ကာကွယ်ရေးတပ်ဖွဲ့(PDF)များက လုံခြုံရေးစောင့်ရှောက်ခဲ့ကာ လူဦးရေ ထောင်ချီ တက်ရောက်ခဲ့သည်။
