▪️စစ်ကောင်စီတပ်က လက်နက်ကြီးများပစ်ခတ်၍ ဒေသခံများ၏ နေအိမ်နှင့်စျေးဆိုင်အချို့ ပျက်စီး
ကရင်ပြည်နယ် ကော့ကရိတ်မြို့အနီးတ၀ိုက်တွင် နယ်မြေကျော်လွန်လှုပ်ရှား နေရာယူလာသည့် စစ်ကောင် စီတပ်ကို ကရင်အမျိုးသားအစည်းအရုံး(KNU) တပ်ဖွဲ့ဝင်များက တိုက်ခိုက်ခဲ့၍ စစ်ကောင်စီတပ်က သုံးဦးသေဆုံးခဲ့ကြောင်း ဒေသခံတစ်ဦးက ပြောသည်။
ယမန်နေ့(ဇန်နဝါရီ ၁၄)ညပိုင်းက ဖြစ်ပွားခဲ့သည့် ဖြစ်စဉ်တွင် စစ်ကောင်စီတပ်က လက်နက်ကြီးများဖြင့် ပစ်ခတ်၍ မြို့နေပြည်သူလူထု၏ နေအိမ်အချို့နှင့် စျေးဆိုင်၊ အလုပ်ရုံအချို့ ပျက်စီးမှု ဖြစ်ခဲ့သည်ဟု ဆိုသည်။
“တိုက်ပွဲအသွင်တော့ ဖြစ်တာပေါ့။ သူတို့က နယ်မြေကျူးကျော်ပြီး ဝင်လာတဲ့အတွက်ကြောင့်အလစ်ငိုက်ပြီးတော့ KNUက သွားဝင်တိုက်လိုက်တာ ကျွန်တော်ကြားတာတော့စစ်ကောင်စီဘက်က သုံးဦးကျတယ်၊ ဒဏ်ရာ လေးဦးရတယ်လို့ ကြားတယ်”ဟု ဒေသခံက ပြောသည်။
ကော့ကရိတ်အခြေစိုက် စစ်ကောင်စီ၏ ခလရ(၂၃၁)နှင့် ခလရ(၉၇)တပ်တို့ကလည်း လက်နက်ကြီးများဖြင့် ဆက်တိုက်ပစ်ခတ်ခဲ့ရာ ယမန်နေ့ည ၁၀နာရီခန့်အထိ ကြာမြင့်ခဲ့ကြောင်း ၎င်းကဆိုသည်။
“အိမ်တွေဘာတွေတော့ ထိခိုက်မှုရှိတယ်။ တစ်မိုင်ကုန်းက ဆိုင်တစ်ဆိုင်လည်းပျက်စီးသွားတယ်။ နောက်ပြီးတော့ အဲဒီအနီးအနားမှာရှိတဲ့ ဝပ်ရှော့ရုံတွေလည်း ထိခိုက်တယ်”ဟု ဒေသခံက ပြောသည်။
ထိုသို့ လက်နက်ကြီးများပစ်ခတ်ခဲ့ခြင်းကြောင့် မြို့ခံများ ဗုံးခိုကျင်းများ၌ ခိုလှုံခဲ့ရကြောင်း မြို့ခံအချို့က လူမှုကွန်ရက်တွင် ရေးသားထားသည်။