ကေအဲန်ယူ-ကရင်အမျိုးသားအစည်းအရုံး ကော်သူးလေအုပ်ချုပ်မှုနယ်မြေမှာ ၁၀ ရက်တာအတွင်း အာဏာသိမ်းစစ်အုပ်စုနဲ့ ကရင်အမျိုးသားလွတ်မြောက်ရေးတပ်မတော်တို့အကြား တိုက်ပွဲပေါင်း (၁၀၅) ကြိမ်ဖြစ်ပွားခဲ့ပြီး စစ်အုပ်စုဘက်က အယောက် ၁၀၀ ကျော်သေဆုံးခဲ့တယ်လို့ ကေအဲန်ယူက သတင်းထုတ်ပြန်ထားပါတယ်။
စစ်ကောင်စီတပ်နဲ့ နယ်ခြားစောင့်တပ်(BGF)ပူးပေါင်းတပ်ဖွဲ့တို့ဟာ ကော်သူးလေအုပ်ချုပ်နယ်မြေထဲမှာ စစ်ရေးလှုပ်ရှားမှုတွေ အဆက်မပြတ်လုပ်ဆောင်ခဲ့တဲ့အတွက် ကရင်အမျိုးသားလွတ်မြောက်ရေးတပ်မတော်(KNLA)၊ ကရင်အမျိုးသားကာကွယ်ရေးတပ်(KNDO)တို့အကြား ထိတွေ့ပစ်ခတ်မှုတွေ နေ့စဉ်ဖြစ်ပွားခဲ့တာပါ။
ဇန်နဝါရီ ၁၅ ရက်ကနေ ၂၅ ရက်အထိ ၁၀ ရက်တာအတွင်း တိုက်ပွဲပေါင်း (၁၀၅) ကြိမ်ဖြစ်ပွားခဲ့ရာ စစ်အုပ်စုဘက်က (၁၅၀) သေဆုံးခဲ့ပြီး (၁၁၅) ယောက် ထိခိုက်ဒဏ်ရာရရှိသွားခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
အာဏာသိမ်းစစ်ကောင်စီဘက်က သေဆုံးသွားသူတွေထဲမှာ စစ်သမီးတစ်ဦးလည်း ပါဝင်ခဲ့တယ်လို့ ထုတ်ပြန်ချက်မှာ ပါရှိပါတယ်။
Public Service Announcement
ဒါ့အပြင် နယ်ခြားစောင့်တပ်(BGF) တပ်ဖွဲ့က ကျေးရွာထဲကို လက်နက်ကြီးပစ်ခတ်တာတွေ မကြာခဏပြုလုပ်တဲ့အတွက် ဒီ ၁၀ ရက်တာအတွင်းမှာ ပြည်သူ ၃ ဦးသေဆုံးခဲ့ပြီး ၄ ဦးဒဏ်ရာရရှိသွားခဲ့တယ်လို့ သိရပါတယ်။
ထိတွေ့ပစ်ခတ်မှုတွေ နေ့စဉ်ဖြစ်ပွားနေတာကြောင့် ကေအဲန်ယူ ကရင်အမျိုးသားအစည်းအရုံး ကော်သူးလေအုပ်ချုပ်နယ်မြေဖြစ်တဲ့ ဒူးသထူ၊ ညောင်လေးပင်၊ ဘိတ်ထားဝယ်၊ မူတြော်နဲ့ ဒူးပလာယာခရိုင်ထဲက ထွက်ပြေးတိမ်းရှောင်နေရတဲ့ ဒေသခံပြည်သူတွေလူထုတွေဟာ ဒီကနေ့အချိန်ထိ နေရပ်ကို မပြန်နိုင်သေးဘူးလို့ ထုတ်ပြန်ချက်မှာ ပါရှိပါတယ်။
စစ်ကောင်စီရဲ့ စစ်ရေးလှုပ်ရှားမှုကြောင့် ကျောင်းတွေကို ပိတ်ထားရတဲ့အတွက် ကျောင်းသားကျောင်းသူနဲ့ လူငယ်တွေဟာ ပညာမသင်ကြားနိုင်တော့ပဲ တောတောင်တွေမှာ ထွက်ပြေးပုန်းအောင်းခဲ့ရပြီး စစ်ရှောင်ပြည်သူလူထုတွေဟာ ဆင်းရဲ့ဒုက္ခတွေမျိုးစုံနဲ့ ရင်ဆုံကြုံတွေ့နေရတယ်လို့ ကေအဲန်ယူရဲ့ ထုတ်ပြန်ထားချက်အရ သိရပါတယ်။
