●၂၀၀၁-၂၀၀၂ ခုနှစ်များသို့ ပြန်မသွားလိုကြောင်းနှင့် အများပြည်သူ ၂၄နာရီ မီးလင်းပါစေကြောင်း ဆန္ဒပြုခဲ့
မန္တလေးတိုင်း ကျောက်ပန်းတောင်းမြို့ရှိ လျှပ်စစ်ရုံးရှေ့တွင် အမျိုးသားတစ်ဦးသည် ယနေ့ ဖေဖော်ဝါရီ ၁ရက် မနက်တွှင် မိမိကိုယ်ကိုယ် ဓာတ်ဆီလောင်းမီးရှို့ ဆန္ဒထုတ်ဖော်ခဲ့ရာ အသက်အန္တရာယ် စိုးရိမ်ရကြောင်း မြို့ခံတစ်ဦးက ပြောသည်။
ဆန္ဒထုတ်ဖော်သူသည် ကျောက်ပန်းတောင်းမြို့ ပြည်တော်သာရပ်ကွက်မှ သံပန်းလုပ်ငန်းလုပ်ကိုင်သည့် ကိုအောင်အောင်ဖြစ်သည်။
“လျှပ်စစ်ရုံးရှေ့ သူ့ဟာသူ ဓာတ်ဆီလောင်းပြီး မီးရှို့ဆန္ဒပြတာ။ ယောက်ျားလေး ပြည်တော်သာထဲက” ဟု မြို့ခံက ပြောသည်။ ဆန္ဒပြ အမျိုးသား၏ အသက်အန္တရာယ် စိုးရိမ်နေရပြီး ၎င်းကို ဆေးရုံတင်ထားသည်ဟု ၎င်းက ဆိုသည်။
ကိုယ့်ကိုယ်ကို မီးရှို့ဆန္ဒပြခဲ့သော အမျိုးသားက” ၂၄ နာရီလုံး အများပြည်သူ+ပြည်သားမီးလင်းပါစေ ၊ ၂၀၀၁+ ၂၀၀၂ ပြန်မသွား ” ဟုစာရေး၍ ဆန္ဒထုတ်ဖော်ခဲ့သည်ကိုတွေ့ရသည်။
“ဒီလိုမျိုးဟာတော့ ပထမဆုံးအကြိမ်ပဲ။ တော်တော်ခံစားချက် ပြင်းလို့ဖြစ်မယ်။ တို့မြို့ကလည်း လျှပ်စစ်မီးက ပြတ်လိုက်လာလိုက်က ကြာပြီလေ။ မြို့နားပတ်ချာလည်က မီးတွေဖြတ်ကုန်ပြီ။ မီတာဘီလ်မဆောင်လို့ဆိုပြီး တော်တော်များများကို ဖြတ်တာ” ဟု ကျောက်ပန်းတောင်းမြို့ခံက ပြောသည်။
ကျောက်ပန်းတောင်းမြို့သည် စစ်အာဏာရှင်ဆန့်ကျင်ရေး ငြိမ်းချမ်းစွာ ဆန္ဒထုတ်ဖော်မှုများ အားကောင်းခဲ့သည့် မြို့ဖြစ်ပြီး အသံတိတ် သပိတ်အပါအဝင် စစ်အာဏာရှင် ဆန့်ကျင်သည့် လှုပ်ရှားမှုများတွင် မြို့သူမြို့သားများ တက်ကြွစွာ ပါဝင်နေသော မြို့ဖြစ်သည်။