နေရာဒေသအသီးသီးရှိကရင်အမျိုးသားများအနေဖြင့် ကရင်အမျိုးသားများ၏ နိုင်ငံရေးရည်မှန်း ချက်ပန်းတိုင်သို့ပြည့်အောင်မြင်စေရန် မိမိတို့၏ကျွမ်းကျင်ရာအခန်း ကဏ္ဍအသီးသီးမှ ကရင်အမျိုးသားအစည်းအရုံး(KNU) ၏ကြိုးပမ်းအားထုတ်မှုများနှင့် ဆောင်ရွက်လှုပ်ရှားမှုများ အပေါ်ပူးပေါင်းပါဝင်ကြရန်အထူးလိုအပ်ကြောင်း KNU ဥက္ကဋ္ဌဗိုလ်ချုပ်ကြီး စောမူတူးစေးဖိုးက ပြောကြားသည်။
ယနေ့ကျရောက်သည့် KNU ဖွဲ့စည်းတည်ထောင်ခြင်း၇၅နှစ်မြောက်နေ့သို့KNU ဥက္ကဋ္ဌကသဝဏ်လွှာ ပေးပို့ခဲ့ရာ ကရင်အမျိုးသားအဖွဲ့အစည်းများအနေဖြင့် သက်ဆိုင်ရာအခန်းကဏ္ဍများတို့တွင် တစ်စုတစ်စည်းတည်းဖြင့် ညှိနှိုင်း လုပ်ဆောင်သွားနိုင်ရန်လိုအပ်သည်ဟုလည်းဖော်ပြထားသည်။
ကရင်အမျိုးသားအစည်းအရုံး၏အဓိကရည်ရွယ်ချက်သည်ကရင်အမျိုးသားများ၏နိုင်ငံရေးရည်မှန်းချက် ပန်းတိုင်ဖြစ်သည့်အမျိုးသားတန်းတူရေးအပြင်မတူကွဲပြားလျက်ရှိသောလူမျိုးတိုင်း၏အခွင့်အရေးနှင့် ကိုယ်ပိုင်ပြဌာန်းခွင့်များကိုအပြည့်အ၀အာမခံချက်ပေးနိုင်သောဖက်ဒရယ်ပြည်ထောင်စုတည်ဆောက် ရေးပင်ဖြစ်သည်ဟုKNU ဥက္ကဋ္ဌကပြောသည်။
၇၅ နှစ်မြောက် ကရင်အမျိုးသားအစည်းအရုံးနေ့ KNU DAY ကို ယနေ့ ဖေဖော်ဝါရီလ ၅ ရက်နေ့တွင် KNU ကော်သူးလေ အုပ်ချုပ်နယ်မြေ တစ်နေရာ၌ ကျင်းပပြုလုပ်ခဲ့သည်။
အခမ်းအနားတွင်အလံတော်လေးပြုခြင်းနှင့် ကျဆုံးလေပြီးသော အာဇာနည် ခေါင်းဆောင်များ၊ ရဲဘော်ရဲဘက်များ နှင့် ပြည်သူလူထုများကို အလေးပြုခြင်း၊ KNU ဥက္ကဋ္ဌ ၏ သဝဏ်လွှာ ကို ဖတ်ကြားခြင်း၊ KNU DAY ဖြစ်ပေါ်လာပုံကိုရှင်းလင်းခြင်း၊ ဂုဏ်ပြုသီချင်းသီဆိုခြင်း များပြု လုပ်ခဲ့ပြီးအဖွဲ့ဒုဥက္ကဋ္ဌ ပဒို စောကွယ်ထူးဝင်း ၊စစ်ဦးစီးချုပ်ဗိုလ်ချုပ်ကြီးစောဂျော်နီအပါအဝင်KNU ခေါင်းဆောင်များကဂုဏ်ပြုစကားပြောကြားခဲ့သည်။