ကော့ကရိတ်မြို့နယ် ရွာကလေးရွာမှာ ဖေဖေါ်ဝါရီ ၅ ရက်က စစ်ကောင်စီရဲ့လက်နက်ကြီးပစ်ခတ်မှုကြောင့် ကိုယ်ဝန်ဆောင်တစ်ဦးအပါအဝင် သုံးဦးထိခိုက်ဒဏ်ရာရခဲ့တယ်လို့ ကရင်လူ့အခွင့်အရေးအဖွဲ့(KHRG)ရဲ့ ထုတ်ပြန်ပါတယ်။
ဖေဖေါ်ဝါရီ ၅ ရက် မနက်ပိုင်းက ကေအဲန်ယူ-ဒူးပလာယာခရိုင် ကော့ကရိတ်မြို့နယ် နို့ဖိုးကျေးရွာအုပ်စု ရွာကလေးကျေးရွာထဲကို စစ်ကောင်စီတပ်က လက်နက်ကြီးနဲ့ပစ်ခတ်ခဲ့ပြီး ကျေးရွာထဲကို လက်နက်ကြီး ၆ လုံးကျရောက်ခဲ့တာလို့ ထုတ်ပြန်ချက်မှာ ဖော်ပြထားတာပါ။
ဒီလို ကျေးရွာထဲကို လက်နက်ကြီးကျရောက်ရောက်ပေါက်ကွဲမှုကြောင့် ရွာကလေးရွာက ကိုယ်ဝန်သည်တစ်ဦး၊ အသက် ၄ နှစ်အရွယ် ကလေးငယ်တစ်ဦးနဲ့ ဆယ်ကျော်သက်လူငယ်တစ်ဦးတို့ ထိခိုက်ဒဏ်ရာရရှိသွားခဲ့ပြီး နေအိမ်သုံးလုံးလည်း ထိခိုက်ပျက်စီးသွားခဲ့တယ်လို့ KHRG ဆီကနေ သိရပါတယ်။
မနေ့က ကော့ကရိတ်-မြ၀တီအာရှလမ်းမကြီးတစ်နေရာမှာ စစ်ကောင်စီတပ်နဲ့ KNLA တပ်မဟာ ၆ တို့အကြား ထိတွေ့ပစ်ခတ်မှု မိနစ်အနည်းငယ်ကြာ ဖြစ်ပွားခဲ့ပြီးတဲ့နောက် စစ်ကောင်စီက လက်နက်ကြီးနဲ့ အခုလို ကျေးရွာတွေကို ပစ်ခတ်နေတာဖြစ်ပါတယ်။
Public Service Announcement
ကေအဲန်ယူ-ဒူးပလာယာခရိုင် တပ်မဟာ ၆ နယ်မြေ ကော့ကရိတ်မြို့နယ်ထဲမှာ စစ်ကောင်စီတပ်တွေက စစ်ရေးဝင်ရောက်လှုပ်ရှားမှုတွေရှိနေပြီး ဒေသခံရွာသားတွေကို ဖမ်းဆီးနှိပ်စက်တာ၊ လက်နက်ကြီးနဲ့ရမ်းသမ်းပစ်ခတ်တာနဲ့ လေကြောင်းတိုက်ခိုက်တာတွေ ပြုလုပ်နေတာကြောင့် အရပ်သားပြည်သူတွေ ထိခိုက်သေဆုံး ဒဏ်ရာရရှိမှုတွေကြုံဆုံနေရပြီး ဒီကနေ့အချိန်ထိ ထွက်ပြေးတိမ်းရှောင်နေရတာတွေလည်း ရှိနေတာဖြစ်ပါတယ်။
