ပေါက်နယ်တွင် ​ငွေ​တောင်းခံ​နေသည့် စခန်းမှူးနှင့် ပျူများကို တိုက်ခိုက်ခဲ့ဟု ​PDF​ပြော

အိမ်ထောင်စုဇယားများစစ်ဆေးပြီး အဓမ္မငွေတောင်းခံနေသော စခန်းမှူးအပါအဝင် အကြမ်းဖက်စစ်ကောင်စီတပ်သားများနှင့် ပျူစောထီးများကို သွားရောက်တိုက်ခိုက်ခဲ့ကြောင်း Southern Pauk PDF က ထုတ်ပြန်သည်။

တိုက်ပွဲ ဖြစ်စဥ်မှာ ပေါက်မြို့နယ် ကိုင်းလယ်အုပ်စုမှ ရဲစခန်းမှူးဦးဆောင်ကာ ရဲများနှင့် ပျူစောထီးများပူးပေါင်း၍ ကျေးရွာများမှ အိမ်ထောင်စုစာရင်းကို စစ်ဆေးကာငွေတောင်းသဖြင့် ဖေဖော်ဝါရီ ၆ ရက် ညနေ ၄နာရီခန့်က စန်းရေခုံကျေးရွာ စာသင်ကျောင်းဝန်းထဲ၌ တပ်စွဲထားသည့် အကြမ်းဖက်စစ်ကောင်စီတပ်ကို ၁၅ မိနစ်ကြာ သွားရောက်တိုက်ခိုက်ခဲ့ခြင်းဖြစ်သည်။

“စစ်ခွေးစခန်းမှူး ရာဇူးမောင်ဦးဆောင်ပြီ ငွေညစ်နေတာ။သတင်းကြားတာနဲ့ ကျွန်တော်တို့ ဝင်တိုက်တာ”ဟု Southern Pauk PDF တာဝန်ရှိသူတစ်ဦးက လူထုနွေဦးသို့ ပြောသည်။

ဖြစ်စဥ်တွင် အကြမ်းဖက်စစ်တပ်၏ ရဲနှင့် ပျူစောထီးဘက်မှ ထိခိုက်သေဆုံးမှုရှိသော်လည်း အသေးစိတ်ကိုဆက်လက်စုံစမ်းနေသည်ဟု ၎င်းက ဆိုသည်။

Public Service Announcement

သွားရောက်တိုက်ခိုက်ခဲ့သော Southern Pauk PDF တပ်ရင်း( ၂)မှ ရဲဘော်များအထိအခိုက်မရှိ ဆုတ်ခွာနိုင်ခဲ့သည်ဟုလည်း ထုတ်ပြန်ချက်၌ ဖော်ပြသည်။