စစ်ကောင်စီ၏အခမ်းအနား KNUကိုယ်စားလှယ်စေလွှတ်ခြင်းမရှိဟုပြော
ကရင်အမျိုးသားအစည်းအရုံး(KNU)အနေဖြင့် စစ်ကောင်စီနှင့် ဆွေးနွေးရန်မရှိဘဲ စစ်အာဏာရှင် အမြစ်ပြတ်အောင်တိုက်ထုတ်ရန်သာရှိကြောင်း KNU ဗဟိုမှ သတင်းရင်းမြစ်တစ်ဦးက ပြောသည်။
“ကျွန်တော်တို့က လူထုနဲ့ တစ်သားတည်း။ အခုလက်ရှိ နိုင်ငံရေးအင်အားစုတွေ CRPHတို့ NUG တို့နဲ့ နိုင်ငံရေးအရပူးတွဲပြီး စစ်အာဏာရှင်ကို အမြစ်ပြတ် ပူးပေါင်းဆောင်ရွက်ဖို့ပဲ။ စစ်ရေးအရလည်း တိုင်းရင်းသားတွေနဲ့ လက်တွဲပြီး ပူးပေါင်းဆောင်ရွက်မယ်။ လက်ရှိ ဖြစ်ပေါ် လာတဲ့ PDFနဲ့ ပူးပေါင်းပြီးတော့ အမြစ်ပြတ်အောင်ချမှာ”ဟု ၎င်းက ဆိုသည်။
ယနေ့စစ်ကောင်စီ ကျင်းပသည့် ပြည်ထောင်စုနေ့ အခမ်း အနားသို့ KNU ကိုယ်စားလှယ် တက်ရောက်သည်ဆိုသည့် သတင်းများနှင့်ပတ်သက်ပြီးလည်း ၎င်းက ငြင်းဆိုလိုက်ပြီး ကိုယ်စားလှယ်စေလွှတ်ခြင်းမရှိဟု ပြော သည်။
Public Service Announcement
ယင်းအခမ်းအနားသို့ ယခင် KNU ဒူးပလာယာခရိုင် ဥက္ကဋ္ဌဟောင်းဖြစ်သူ ပဒိုရွှေမောင်းတက်ရောက်သည် ဆိုသည့် သတင်းများကြားသိရပြီး ထိုသို့ သွားရောက်မှုသည် အဖွဲ့အစည်းက ခွင့်ပြုချက်ဖြင့် မဟုတ်ကြောင်း KNUဗဟိုမှ သတင်းရင်းမြစ်က ပြောသည်။
“အဖွဲ့အစည်း ခွင့်ပြုချက်မရှိဘူး။ ကျွန်တော်တို့ သူ့ကို ခွင့်မပြုဘူး။ သူသွားတာ သူတစ်ဦးတစ်ယောက်အနေနဲ့ သူ့ဆုံးဖြတ်ချက်နဲ့ သူသွားတာ။နောက် သူ့ခရိုင်မှာလည်း သူ့ကိုလည်း ခွင့်မပြုထားဘူး။ သူ့အနေနဲ့ ခရိုင်ဥက္ကဋ္ဌ တာဝန်ကို ခရိုင်ဒုဥက္ကဋ္ဌ လက်ရှိ တပ်မဟာ(၆)မှူးကို သူလွှဲလိုက်တယ်။ အဲဒါကြောင့် သူ့ပုဂ္ဂိုလ်ရေးနဲ့ပဲ သူသွားတယ် အဲဒီလိုပဲပြောလို့ရတယ်”ဟု ၎င်းက ဆိုသည်။
KNU အနေဖြင့် စစ်တပ်အာဏာသိမ်းမှုကို လက်မခံကြောင်းနှင့် လူထုနှင့်အတူရပ်တည်ကာ စစ်အာဏာရှင် အမြစ်ဖြတ်ရေး ဆောင်ရွက်သွားမည်ဖြစ်ကြောင်း အကြိမ်ကြိမ် ထုတ်ဖော်ပြောဆိုထားသည်။
