မုံရွာခရိုင်တပ်ရင်း – ၂ (Chindwin Attack Force) ၏ အထူးကွန်မန်ဒိုတပ်ဖွဲ့ နှင့် ယင်းမာပင်PDFအဖွဲ့ များပူးပေါင်းကာ ယင်းမာပင်မြို့နယ်ရှိ အကြမ်းဖက်စစ်ကောင်စီတပ်ဖွဲ့ဝင် ၁၀၀ထက်မနည်း တပ်စွဲထားသော စုပေါင်းရုံးနှင့် ရဲစခန်းကို ဖေဖော်ဝါရီ ၁၂ရက် ည ၁နာရီဝန်းကျင်ကတစ်ကြိမ် အဝေးပစ်လက်နက်ကြီး ၅ခုဖြင့် အချက်ရေ ၄၀ကျော် ပစ်ခတ်တိုက်ခိုက်ခဲ့သည်။
ဖေဖော်ဝါရီ ၁၃ ရက်တွင်လည်း အဝေးပစ်လက်နက်ကြီး ၅ ခုဖြင့် အချက်ရေ ၃၀ကျော် ဆက်လက်ပစ်ခတ်တိုက်ခိုက်ခဲ့သည်။ ထို့အပြင် ဖေဖော်ဝါရီ ၁၄ ရက်တွင်လည်း အဆိုပါလက်နက်ကြီး ၅ ခုဖြင့်ပင် အချက်ရေ ၅၀ကျော်ပစ်ခတ်တိုက်ခိုက်ခဲ့ကြောင်း၊ ထို့အပြင် ဒရုန်းပျံသန်းစက်များတွင် EYC ဗုံးများတပ်ဆင်၍ ပစ်ချတိုက်ခိုက်ခဲ့သေးကြောင်း၊ လက်တလောစုံစမ်းမှုများအရ အထိအခိုက်သေဆုံးမှုများနိုင်ပြီး ၃၀ဦးထက်မနည်းသေဆုံးထိခိုက်ဒဏ်ရာ ရနိုင်ကြောင်း မုံရွာခရိုင် တပ်ရင်း (၂)က သတင်းထုတ်ပြန်သည်။
ဖေဖော်ဝါရီ၁၁ ရက် နံနက် ၉နာရီမိနစ်၄၀ခန့်က အမိမြေတော်လှန်ရေးတပ်ဖွဲ့နှင့်အတူ ချိုမိုင်မိုင်တပ်ဖွဲ့၊ Regional Friend Fighters နှင့် ပြောက်ကျားရဲဘော်များ စုပေါင်း၍ စွန်ရဲစစ်ဆင်ရေးအဖြစ် သက်မှတ်ပြီး ယင်းမာပင်မြို့နယ် ရွှေတောင်ဦးအနီးရှိ အောင်ဇေယျကုန်းနှင့် ရဲတပ်ရင်း(၂၈)ကြားကိုလည်းကောင်း၊ ရဲတပ်ရင်း(၂၈)အတွင်းကို လည်းကောင်း၊ ပစ်မှတ်နှစ်ခုထား၍ မိုင်းစနစ်ဖြင့်တိုက်ခိုက်ခဲ့သေးသည်။ အောင်ဇေယျကုန်းနှင့် ရဲတပ်ရင်း(၂၈)ကြား မိုင်းခွဲတိုက်ခိုက်မှုတွင် ရဲ ၁၀ဦးခန့်သေဆုံးပြီး ထိခိုက်ဒဏ်ရာရသူ အများအပြားရှိကြောင်း၊ ရဲတပ်ရင်းဂိတ်ဝမှထွက်လာသော ရဲများကိုတိုက်ခိုက်ရာ ရဲလေးဦး သေဆုံးခဲ့ကြောင်း ပြည်သူ့ကာကွယ်ရေးအဖွဲ့များက ထုတ်ပြန်ထားသည်။
